 |
 |
Cartref newydd - gyda gardd a phiano!
Mae Beks newydd symud i gartref newydd yn Hong Kong - a chael piano newydd
|
Maen nhw'n dweud y gall symud tŷ achosi cymaint o stres ag ysgaru - ac ar ôl symud tŷ gyda thri phlentyn yn rhedeg ymhlith y bocsys rhaid imi gytuno'n llwyr!
Ar ôl y gwaith caled o bacio a dadbacio dros benwythnos y Pasg gallaf nawr ddweud gyda gwên ar fy wyneb ein bod wedi ymgartrefu'n braf yn Villa Martini.
Wir i chi - dyna enw'r lle.
Felly dwi'n edrych 'mlaen at haf hir gyda sawl parti coctel ac, yn naturiol, coctel y dydd fydd y ddiod wen honno sy'n well "shaken not stirred!"
Oes, mae rhywbeth yn Bondaidd iawn am y lle!
Trydydd cartref
Dyma fy nhrydydd cartref yn HK a'n trydydd fflat yn nhre marchnad a glan y môr Stanley yn ne ynys HK.
Pan symudon ni i'n fflat diwethaf dim ond tri ohonom oedd yna - Rod, Els a minnau - ond roedd pethau dipyn yn wahanol arnom yn gadael gyda Harri a Joni wedi ymuno â ni erbyn hynny!
Mae Ela'n ffan mawr o lyfrau plant Julia Donaldson - ac fe fydd y rhai hynny ohonoch sy'n gyfarwydd â'i llyfrau yn cofio am yr hen fenyw yn A Squash and a Squeeze! ac felly'n union yr oeddem ninnau - bron iawn yn disgyn dros ein gilydd!
Pum person mewn fflat 1700 troedfedd sgwâr - nes inni ddarganfod Villa Martini!
Gerddi ar y to
Peth anghyffredin iawn yw rhentu neu brynu lle gyda gardd yn HK a phawb, fwy neu lai, yn byw mewn fflat.
Mae 'real estate' yn gostus ofnadwy gan wneud HK yn un o'r lleoedd drutaf yn y byd.
Mae cael gardd ar y to yn llawer mwy cyffredin ac yn lle arbennig ar gyfer barbiciw, torheulo, chwarae ayb.
Rydym ni wedi rhentu llefydd gyda dau do dros y blynyddoedd diwethaf a chael ambell i barti lloerig iawn.
Wrth gwrs, mae elfen o beryg yn hyn a bu ambell i ddamwain erchyll a chan fod gennym ni dri phlentyn rwyf wedi dod i'r casgliad ei bod hi'n saffach bod heb do.
Hoffi gardd
Dwi wastad wedi bod yn 'berson gardd' ac yn gweld ishe cael gardd go iawn fel ag yng Nghymru - felly, dychmygwch pa mor hapus oeddwn i o ddarganfod y lle hwn; tŷ ar y traeth gyda gardd.
Nefoedd!
Mae Villa Martini yn perthyn i'r hen HK gyda naws wladfaol -colonial - iawn iddo.
Mae'r nenfwd yn uchel gyda fans i bob un.
Mae darnau ffansi o haearn ar y ffenestri a phalmwydd a bambŵ yn tyfu yn yr ardd sydd dros y ffordd i'r traeth.
Gallwch ddychmygu pobol, flynyddoedd yn ôl, yn eistedd ar y feranda yn yfed gin a thonics yn braf iawn!
Mae dipyn yn fwy na'r hen fflat a does dim rhaid inni gerdded lan bedwar llawr i gyrraedd adref!
Go brin y byddaf mor heini yn byw fan hyn ag oeddwn yn yr hen dŷ!!!
Gwneud ffrindiau
Yn ffodus iawn gwnaeth y plant ffrindiau'n barod gyda rhai eraill yn yr adeilad a theimlwn ar adegau fel pe byddem yng Nghymru o wylio plant cymdogion yn chwarae yn yr ardd a phawb ar eu beics neu sgwtars.
Mae cadw lawnt deidi yn dipyn o her, fodd bynnag, a chan ei bod hi'n glawio tipyn yma yn yr haf rwy'n ofni mai gardd fwd fydd gennym ni fis Awst!!!
Ond, wedyn, prin bod yna law o gwbl rhwng Medi a Rhagfyr a chan ei bod mor dwym hefyd bydd yn siŵr o fod fel y Sahara mas 'na!!!
Prynu piano
Ers symud cefais hwyl yn prynu ambell i ddodrefnyn newydd gan gynnwys rhywbeth rwyf wedi bod ei eisiau ers sbel - piano!!!
Roeddwn yn canu'r piano gryn dipyn yn blentyn ond heb gael cyfle ers hynny ac rwy'n ysu at gael gwersi unwaith eto.
Mae Ela hefyd yn awyddus i ddysgu ac yn naturiol bydd Harri a Joni am gael eu bysedd bach brwnt arno cyn hir.
Cefais fargen gan imi brynu piano bach pert ail law gan fenyw o Awstralia am ddau can punt a hanner!
Wn i ddim beth fydd gan y cymdogion i'w ddweud am y sŵn ond eu hanlwc hwy yw hynny - rwyf wedi aros tan nawr cyn gwireddu'r freuddwyd.
Nawr, rwy'n breuddwydio am nosweithiau hir o eistedd wrth y piano gyda Martin yn handi . . .
|
|
