O'r diwedd daeth diwrnod mawr ein tŷ ni!
Y diwrnod yr ydym ni wedi bod yn siarad amdano ers y Dolig - Mai 4, dydd pen-blwydd Ela Mai yn bedair oed!!!
Mae'n gwbwl anhygoel faint o wahaniaeth sydd wedi bod yn yr amser "arwain lan" at y parti yma o gymharu â dathlu ei phen-blwydd yn dair.
Cefais wybod tua mis Chwefror sut ben-blwydd oedd galw amdano.
Wrth gwrs, mae pethau fel hyn yn fater o "fyw neu farw" pan ydych chi'n bedair oed, credwch chi fi.
Mae eisoes yn draddodiad inni ddathlu'r achlysur yma ar y to ac felly y bu hi eleni yn y fflat newydd.
Parti Tywysogesau a Marchogion - Princesses and Knights - ar y to!!!
Pethau wedi newid
Pan oeddwn i'n blentyn roedd mynd i ddathliad pen-blwydd yn golygu "te parti" go iawn gydag ambell gêm fel pasio'r parsel neu gofgolofnau cerdd yn y canol.
Yn naturiol, roedd yna gacen ben-blwydd a bag bach gyda darn o'r gacen ac, efallai, ambell sticer, i fynd adre.
Bois, mae'r cyfnod hwnnw wedi hen ddarfod - wel, yn HK ta beth!!!
 Yn fy marn i mae byw mewn cymdeithas sydd mor ryngwladol gyda phlant o bob cwr o'r byd yn cymysgu â'i gilydd yn ddyddiol yn golygu bod chwaeth y plant mewn bwyd yn aeddfed dros ben.
Yn hytrach na brechdan jam neu gaws, creision, jeli a hufen iâ, hanfodion y wledd ydi spring rolls, crab cakes, noodles a phethau felly.
Rhaid cyfaddef fod y pethau hen ffash fel cup cakes a bisgedi yn dal i fod yr un mor boblogaidd hefyd.
Ta beth, o ganlyniad i chwaeth aeddfetach y plant mae angen cogydd arnoch chi i drefnu parti ar gyfer y 30 bach sydd fel arfer yn bresennol gyda rhiant !!!
Oes, mae angen lot o fwyd!!!
Gemau'n bwysig
Mae gemau hefyd yn "beth mawr"!
Er bod y rhai bychan yn ddigon hapus i redeg o gwmpas y to neu chwarae ar eu beiciau, bownsio ar y trampolîn, defnyddio llithren a defnyddio eu dychymyg yn chwarae Peter Pan ( y ffefryn), mamis a dadis ac ati maen nhw hefyd wrth eu boddau gyda gemau fel rhoi cynffon ar asyn a pasio'r parsel .
Ond yr un fwyaf poblogaidd ohonyn nhw i gyd ydi taro'r piñata.
Credaf mai peth Americanaidd yw'r piñata a'r arferiad yw Ilenwi eich piñata gyda losin a phawb wedyn yn cymryd eu tro i daro'r hyn sy'n hongian yn uchel lan gyda bat pêl fâs neu rywbeth tebyg.
Gan mai thema parti Ela oedd Princesses and Knights llwyddais i ddod o hyd i biñata ar ffurf castell tywysoges a chafodd Ela a minnau lawer o hwyl yn llenwi'r peth gyda phob math o losin.
Heb os, taro'r piñata oedd un o uchafbwytniau'r parti.
Fel cŵn yn hela cadno
Roedd y 30 bach yn hapus i aros eu tro i afael yn y bat cyn "mynd amdani!"
Mae'n siŵr i bob plentyn gael tua thri chyfle yr un cyn i un o'r dadis afael yn y bat a chwalu'r peth y racs - a dyna pryd ddechreuodd pethau fynd yn hollol ddwl!
Dwi erioed wedi gweld plant yn "ymosod" ar losin yn y fath fodd na phan ddisgynnodd popeth ar y llawr - sôn am fod fel cŵn yn hel cadno!
I ddweud y gwir, roeddwn yn ofni ar un adeg y byddai rhywun yn cael dolur ond diolch I'r drefn fe ddaeth pawb allan yn fyw gyda gwên fawr ar bob wyneb!!!
Chwythu'r canhwyllau
Y diweddglo ac, heb os, uchafbwynt y diwrnod i'r dywysoges fach yn ein tŷ ni oedd chwythu'r canhwyllau ar y gacen.
Ar un adeg edrychai fel petai hyn yn mynd i fod yn dipyn o jobin gan fod y to yn gwbwl agored ag erbyn diwedd y dydd mae'r gwynt yn medru cydio dipyn!
Yn naturiol, cacen Sindarela - Llyn yr Elyrch oedd dewis Ela fel y gacen berffaith ac wedi dod o hyd i'r ddol roedd bu'n rhaid adeiladu sgert sbwng o gwmpas ei chorff.
Roedd Ela wedi gwirioni'n llwyr ar y gacen binc oedd fel rhywbeth allan o ffilm dylwyth teg!
Ar ôl ceisio goleuo'r canhwyllau sawl gwaith roedd hi'n bryd i bawb ganu ag i'n tywysoges fach chwythu!!!
 Do, bu'n barti llwyddiannus unwaith eto - er, rhaid cyfaddef roedd gen i deimlad y buaswn yn ysbyty y Matilda drannoeth yn croesawu tywysog neu dywysoges fach arall i'r teulu!
O gofio fy mod o fewn llai na mis o gael baban efallai y buasai parti yn Pizza Express wedi bod yn ddoethach o safbwynt gwaith a threfnu.
Ar y llaw arall, rhaid oedd cadw at y traddodiad ac mae gen i'n awr flwyddyn arall i atgyfnerthu!
Bydd angen y nerth arnaf hefyd gan y byddaf yn trefnu parti i ddau yr adeg honno!!!
|
