���˿���

Ar 16 Ionawr 1920, daeth y Deunawfed Gwelliant i'r Cyfansoddiad i rym, gan wneud gwerthu alcohol yn anghyfreithlon yn UDA. Rhoddodd y Gynghrair Gwrth-Salŵn ac Undeb Dirwest Cristnogol y Menywod, a rhai grwpiau crefyddol bwysau ar y llywodraeth i wahardd cynhyrchu a gwerthu alcohol. Roedden nhw'n honni mai gwaith y diafol oedd alcohol a'i fod yn mynd yn erbyn Cristnogaeth.

Roedd hi'n anodd gorfodi Deddf Volstead. Wrth i gangsters ddechrau gwerthu alcohol, datblygodd llawer mwy o droseddu cyfundrefnol. Bootleggers oedd yr enw ar bobl oedd yn gwerthu alcohol. Byddai rum-runners yn smyglo diodydd i UDA o Ganada a Mexico. Byddai moonshiners yn distyllu eu diodydd eu hunain gartref. Agorodd clybiau yfed anghyfreithlon o'r enw speakeasies ac erbyn 1925 roedd dros 10,000 o'r rhain yn Efrog Newydd yn unig. Roedd mwy o lygredd wrth i'r gangsters lwgrwobrwyo swyddogion yr heddlu, barnwyr a gwleidyddion fel eu bod yn anwybyddu eu gweithgarwch anghyfreithlon.

Methiant oedd ceisio gorfodi Deddf y Gwaharddiad. Doedd dim digon o asiantwyr, roedden nhw ar gyflogau isel ac yn hawdd eu llwgrwobrwyo. Roedd hi'n amhosibl perswadio yfwyr i newid arfer oes.

Roedd gangsters ym mhob dinas ac yn ystod y 1920au byddai grwpiau yn ymladd â'i gilydd i reoli ardaloedd penodol. Yn Chicago, Dion O'Bannion oedd yn rheoli'r busnes bootleg yn ne'r ddinas a John Torrio yn y gogledd. Daeth Al Capone yn gymeriad amlwg yn nes ymlaen. Cyflafan Dydd San Ffolant 1929 oedd uchafbwynt rhyfeloedd y gangsters rhwng Bugs Moran ac Al Capone. Yn 1931 cafodd Capone ei brofi'n euog o beidio talu trethi a'i anfon i'r carchar.

Roedd llygredd yn broblem arall yn y 1920au. Yn 1920 cafodd Warren G Harding ei ethol yn Arlywydd UDA. Rhoddodd swyddi pwysig ac awdurdodol i'w ffrindiau. The Ohio Gang oedd grŵp o wleidyddion oedd mewn swyddi pwysig adeg llywodraeth Harding. Bradychodd y rhain ymddiriedaeth y cyhoedd mewn sawl sgandal.

Ar ddechrau 1924, yn fuan ar ôl marwolaeth Harding, dechreuodd pwyllgorau'r Gyngres ymchwilio i adroddiadau o lygredd a llwgrwobrwyo yn ystod gweinyddiaeth Harding. Cafodd sawl aelod o'r Gang eu cyhuddo a'u carcharu am achosion o lygredd. Cafodd Charles R Forbes ei ddyfarnu'n euog o dwyll, cynllwynio a llwgrwobrwyo yn y Veterans' Bureau. Cafodd Albert B Fall ei ddyfarnu'n euog, dirwy o $100,000 a'i garcharu am ei ran yn sgandal Cromen y Tebot. Cafodd Harry M Daugherty ei brofi'n euog o werthu alcohol yn anghyfreithlon a rhoi trwyddedau a phardynau i droseddwyr.