Rownd 2 Y Tir Mawr v Bro Alaw
Rownd 2 Y Tir Mawr v Bro Alaw
Trydargerdd (sef cerdd gaeth neu rydd sydd, fel un o negeseuon Twitter, heb fod dros 140 o nodau cyfrifiadurol):
Adroddiad gêm
6 i 5 i Borto
Bechod nad wyf yno
Dwi’n un o 5 mewn drycin yn y Rhyl
Di gwlychu at ein tronsia
Hwre y chwiban ola
Tîm Rhyl dan 4 dim Prestatyn nil.
Jôs - 8 pwynt.
Obamacare – Affordable Care Act
Ar gardiau’r Gofal Fforddiol,
Bu bidio strategaethol,
Er sawl tric budur ddeliodd o -
Y ‘No Trumps’ oedd fuddugol!
John Wyn Jones - 8 pwynt.
Cwpled caeth yn cynnwys y gair ‘claf’
Tros glaf, po fwya’r siarad,
Y di-glyw ddeil gyllid gwlad.
Huw Erith - 8.5 pwynt.
Wedi’’r glaw cwyd daear glaf
I herio’i marw araf.
Richard Parry Jones - 9 pwynt.
Limrig yn cynnwys y llinell ‘Pe bawn i’n llai cwrtais a hawddgar’
Mi ddwedwn wrth ddyn ar ei bedwar
(Pe bawn i'n llai cwrtais a hawddgar)
Fod cwrw yn iawn
Ond nid ar y pnawn
Ti'n Llywydd y Cymry ar Wasgar.
Jôs - 8.5 pwynt.
“Pe bawn i’n llai cwrtais a hawddgar”
Fe ganwn fy nghorn ar y bygar
A’i basio ar frys
Heb ddiferyn o chwys
A chodi dau fys ar yr uffar.
Ioan Roberts - 8.5 pwynt.
Cywydd (heb fod dros 12 llinell) yn cynnwys cymeriad llythrennol
Cywydd - Haul y Gwanwyn
Gwanwyn ddaeth heibio gynnau:
Gwib newydd am ddydd neu ddau.
Gwenau ym Mawrth – ac 诺yn mân
Goeliodd ym Mai a'i Galan.
Gwynt teg a thelynegol,
Gewin aur ar frigau'n ôl;
Golau'r hwyr yn galw'r hen
Gôr oesol i'r geiriosen.
Gyda'i nerth drwy'r gwaed yn iau,
Glasoed yw'r hen ei gleisiau
Gwanwyn gwyn, ond bu, gan gwaith,
Gwiber ar lwybrau gobaith.
Myrddin ap Dafydd - 9.5 pwynt.
PRIFWYL MÔN
Y mae hon, oedd fam unwaith,
Yma’n dal i gynnal gwaith
Y diwyd sy’n troi daear
Yn dir meithrin gwerin gwâr.
Y mae’n hen ond gwêl ‘leni,
Ymhlith gwae ei hofnau hi,
Yr hin eto’n egin iaith
Yfory, a’i llafurwath
Yno’n wlith i’r gwenith gwyw;
Y ddelfryd o hyd ydyw
Ydlan, ym mhob llan a llys,
Yn llawn o rawn yr Ynys.
Richard Parry Jones - 9 pwynt.
Triban beddargraff argraffydd
Un crefftus iawn wrth bwytho
A'i bleser mawr oedd rhwymo;
Ni charodd lyfr clawr llipa 'rioed –
Clawr caled roed amdano.
Myrddin ap Dafydd - 9 pwynt.
Ei enw oedd “R.Gruffydd”
Yr oedd o yn R graffydd,
Fe’i gwasgwyd gan ddau limo du
Rôl pechu yr R lywydd.
Incio y bu i’r diwadd,
Gwnaeth raglan at ei angladd,
Yn ôl ei arfar, llanast llwyr
Roedd pawb yn hwyr yn cyrradd.
Fy mhapur fu yn nodi
Y mynd a dod a'r priodi
A phob manylyn ynddo fydd
Ar ddydd yr atgyfodi.
Ioan Roberts - 8.5 pwynt.
Cân ysgafn (heb fod dros 20 o linellau a heb fod yn soned): Y Ddarlith
Roedd pawb oedd o bwys i gyd yna – gwleidyddion, gwyddonwyr o frid
Pob un yn nrhi chant ucha’ MENSA a’r cwbwl yn glustia’ i gyd.
O’r diwedd fe geuwyd y drysa’, ac yna, ar drawiad y gong
Bonllefodd yr holl gynulleidfa pan welo’ nhw’r Athro Gon Wong.
R’ôl oes roedd yr enwog athrylith ‘di llwyddo i greu diod hud
Ac heno, yn fyw, yn ei ddarlith, roedd Wong am syfrdanu’r holl fyd
Yn wir, yr oedd grym yn ei hylif i droi y di-enaid yn fyw
A’i wneud o’n Wyddonydd y Ganrif os nad ei ddyrchafu yn dduw.
Ond dioddai Gon Wong efo’r nerfa’, roedd ei wddw’n ddolurus a sych,
Gan gydio’n y botel agosa’ fe’i hyfodd, bob dropyn, fel Ych
“Go dam! dwi ‘di gwneud camgymeriad !” meddyliodd Gon Wong gyda rheg
A’i ddannedd berfformiodd ddetholiad o ddawnsfeydd o Jeina’n ei geg.
Roedd s诺n gan y set ddannedd gosod fel newid mewn cadw-mi-gei
Fe fratho’ nhw Wong yn ei dafod cyn dianc o’i geg lawr ei dei.
A mynd ‘hyd y bwrdd rhwng y gwydrau, tua hanner can milltir yr awr
Ac wedyn i lawr un o’r coesau cyn neidio o’r llwyfan i’r llawr
Y dannedd oedd wrthi’n ffyrnigo gan glecian wrth agor a chau
A’r dorf fel y Môr Coch yn partio wrth weld fod y taclau’n nesau.
Fe lwyddwyd, rhyw sut, i’w cornelu a’r dewr fu’n eu pwnio ‘fo ffyn
A’r dannedd yn dal i ‘sgyrnygu a’u brathu nhw bob hyn a hyn.
Uwchben yr oedd lleni crogedig – achubiaeth i un oedd ar ffo
A thoc roedd y dannedd mileinig ‘di dianc drwy’r ffenest i’r tô.
Ar fast Jac yr Undeb yn swingio yn edrych fel rhan o ‘Ging Kong’
Y dannedd, yn gloff a ‘di blino orweddai ym mhawen Gon Wong.
Bu’r cyfan yn ormod i’r polyn. Disgynodd i’r stryd fatha saeth
A wong a’i set ora’n ei ddilyn fu farw dan fan rhyw ddyn llaeth.
Y ddarlith sydd nawr ond chwedloniaeth. Ni chawsom ein synu gan 诺r
Na fedra fo ddweud y gwahaniaeth rhwng hylif dewiniol a d诺r.
Jôs - 8.5 pwynt.
Daeth dynes wallt brith i’n plith i roi dar lith, “no teeth”.
Un o Gon wy cymaint â dwy, a mwy.
Cyn fo del ddel fel Ter fel a mor fawr â’r cawr.
Dechreuodd yr ar taith faith am saith ac ailadrodd dair gwaith.
Hanes y ddynes a’i theu lu a’i acha u yn ôl Barti Ddu.
Dyn glo oedd o. Ben o Ben Ll欧n oedd un dyn ar ben ei hun,
a aeth yn ei long am Hong Kong o wlad y King Kong ond aeth petha’n rong,
a chas, yn lle gwylio’i gwmp as edrychodd o’i gwm pas
wrth fynd yn ffasd, ffasd methodd Belffasd
gan gyrradd Hondw ras ger y Baha mas yn lle Madras a’r Khyber Pass.
A tasa fo’n gall a throi y ffordd ar all fe all ai
gyrraedd Dub ai, Aber tai fai neu Klandy gai ai.
Bu i’r holl s诺n am dd诺r wneud i un g诺r, fethu â dal ei dd诺r
ac wrth besychu a thagu a thagu, gwlychu
sana a sgidia dyn y sêt gosa.
Erbyn hyn roedd llyn ac ew yn gw yn ar garped glas, peth cas,
mwy o embar as ac er mynd ar ras yn stret am y toi let, methu’r sêt. T诺 lêt.
Wedi gwario’i gein iog, dychwelodd yn da log heb agor ei fal og.
Ddwedai ddim rhagor, mwy y tro nesa, ella, ta ta.
Geraint Jones - 9 pwynt.
Ateb Llinell ar y pryd.
Ni chewch wobr heb golli chwys
Na llyw heb dorchi llewys.
Bro Alaw - 0.5 pwynt.
Telyneg (heb fod dros 18 llinell): Dalen Newydd
Roedd honno'n dref a dalodd y pris
Pan ddaeth y bomiau o'r awyr las.
Penodau o'r llyfrgell chwilfriw a roed
Dan gyrff ar y stryd i arafu gwaed.
Darnau o deulu a heliodd eu pac:
Tai weiren bigog a lloches cefn tryc,
Nes baglu yma i'n breichiau gwyn
Ac estyn eu cais ar y ffurflen wen,
Cyn gweld yn y papur mai eu tynged o hyd
Ydi'r print sy'n arfogi'r gang ar y stryd.
Myrddin ap Dafydd - 9.5 pwynt.
Dalen Newydd
(I arwr)
O’r cysgodion, yn nyddiau’r balaclafa
ti oedd y duw, a’th air
a benderfynai’r ‘awr a’r dydd’
yr hysiai dy weision hwy i flasu’r
swper olaf chwerw,
tra llosgai cannwyll dy grefydd
yn fflach y tanio
ac yn fflam y bomio,
ond wedi troi’r ddalen,
ti oedd y gwas
yn hedfan fel colomen,
drwot ti roedd goleuni gobaith
yn toddi’r cysgodion,
a hyder yr ymddiried
yn goleuo’r corneli
ac ar y ddalen olaf un
roedd cymod a chyfeillgarwch
yn gwefru’r geiriau.
Cen Williams - 9.5 pwynt.
Englyn: Ergyd
Taniodd, a 'chawn drafod hynny', – haerodd;
Pob gair wedi'i saethu;
Ond drwy darth ei phowdwr du
Y nos sy'n ein hynysu.
Myrddin ap Dafydd - 9.5 pwynt.
ERGYD – Marwolaeth Martin McGuinness
Yn s诺n y glec mae eco – hen gynnen
Yn ail-gynnau eto,
Swn milain cigfrain y co’
Yn cyffroi’r cae â’u ffraeo.
Richard Parry Jones - 8.5 pwynt.
Enillwyr - Y Tir Mawr.
