³ÉÈË¿ìÊÖ

Bydd un o lofruddion enwocaf Cymru yn cael ei ryddhau ar barôl.

Cafodd Jeffrey Gafoor ei garcharu yn 2003 am lofruddiaeth Lynette White ym 1988.

Daeth Bwrdd Parôl - wnaeth gyfarfod yn gynharach yn y mis - i’r casgliad ei bod hi'n ddigon saff i ryddhau Gafoor.

Fe gafodd Gafoor ei garcharu am oes gyda gorchymyn iddo dreulio o leiaf 13 mlynedd dan glo. Daeth y cyfnod yna i ben yn 2016.

Roedd ei gais am barôl wedi ei wrthod ar bum achlysur blaenorol.

Mae Gafoor wedi’i gadw mewn carchar agored ers 2020 a chafodd ryddhad undydd ym mis Ionawr 2023.

Yn wreiddiol fe gafodd tri dyn arall eu carcharu am y drosedd cyn iddyn nhw gael eu rhyddhau gan y Llys Apêl.

Ni fydd Gafoor yn cael ei ryddhau yn syth gan fod cyfnod o 21 diwrnod lle mae modd cyflwyno cais i'r bwrdd ailystyried y penderfyniad, a bydd yn aros dan glo tan fod y cyfnod hwnnw ar ben.

Pe bai cais o'r fath yn cael ei gyflwyno, bydd Gafoor yn parhau yn y ddalfa tan fod penderfyniad yn cael ei wneud ynglŷn â'r cais hwnnw.

Cafodd Lynette White ei thrywanu dros 50 o weithiau mewn fflat yn nociau Caerdydd ar Ddydd Sant Ffolant 1988.

Aeth pump o ddynion gerbron llys yn 1990 wedi'u cyhuddo o'i lladd.

Cafodd tri ohonyn nhw - Tony Paris, Yusef Abdullahi a Stephen Miller, a ddaeth yn adnabyddus fel Tri Caerdydd - eu carcharu am oes yn 1990, cyn cael eu rhyddhau ar apêl yn 1992.

Yn 2003 fe wnaeth Heddlu De Cymru ddefnyddio technoleg DNA newydd i'w harwain at y llofrudd go iawn.

Cyfaddefodd Gafoor iddo drywanu Ms White mewn ffrae dros £30.

Arweiniodd yr ymchwiliad cychwynnol i farwolaeth Ms White at un o’r achosion llys troseddol hiraf ym Mhrydain erioed.

Wrth siarad cyn cyfarfod y Bwrdd Parôl yn gynharach yn y mis, dywedodd John Actie, un o'r pum dyn a gafodd eu cyhuddo ar gam o lofruddiaeth, y dylai'r gwrandawiad gael ei gynnal yn gyhoeddus.

Fe wnaeth ei gyfreithwyr ddadlau i gael gwrandawiad preifat er mwyn atal "effaith negyddol" ar y broses.

Fe wnaethon nhw hefyd ddweud fod cyflwr awtistig Gafoor yn golygu y byddai gwrandawiad cyhoeddus yn achosi gormod o straen iddo.

Fe ddaeth y Bwrdd Parôl i'r casgliad nad oedd gwrandawiad cyhoeddus yn "briodol".