³ÉÈË¿ìÊÖ

Mae meddyg blaenllaw yng ngorllewin Cymru yn dweud fod angen canslo pob cynllun i godi ysbyty newydd sbon yn yr ardal.

Wrth siarad â rhaglen Newyddion S4C, dywedodd Dr Dewi Evans bod y syniad o ddatblygu ysbyty ar safle newydd naill ai yn Sanclêr neu Hendy-Gwyn ar Daf yn "nonsens lwyr", gan feirniadu gallu rheolwyr y bwrdd.

Yr wythnos ddiwethaf, fe ddatgelodd Prif Weithredwr Bwrdd Iechyd Prifysgol Hywel Dda na fydd ysbyty'n cael ei godi yn yr ardal am o leiaf ddegawd, gan siomi nifer yn yr ardal.

Mewn ymateb fe ddywedodd y bwrdd iechyd eu bod yn "glynu wrth argymhellion gwariant y Trysorlys", gan sicrhau bod y Gwasanaeth Iechyd yn gwneud y gorau o arian cyhoeddus.

"Dyna'r unig reswm am gael yr ysbyty newydd fel rhyw fath o vanity project i'r rheolwyr," meddai'r cyn-ymgynghorydd plant, Dr Dewi Evans.

"Fydd e ddim er lles y cleifion, fydd e ddim yn lles i'r staff sy'n gweithio yna."

Fe ddywedodd bod y "syniad o'r cychwyn cynta' yn nonsens lwyr", gan ychwanegu y dylid "nid jyst dileu neu ohirio ond canslo'r peth".

Yn ôl Phil Kloer, prif weithredwr newydd Bwrdd Iechyd Hywel Dda, fydd ysbyty newydd i orllewin Cymru o bosib ddim yn cael ei adeiladu am o leiaf 10 mlynedd ac "o bosib yn hirach".

Roedd ysbyty newydd i fod wedi cael ei adeiladu erbyn 2029, gyda dau safle posib eisoes wedi cael eu clustnodi - un yn Sanclêr ac un yn Hendy-gwyn ar Daf.

Mae pryderon wedi eu codi ynghylch adeilad Ysbyty Glangwili, lle mae gofal brys yn cael ei ddarparu ar hyn o bryd i gleifion yng ngorllewin Cymru.

Beirniadu arweinyddiaeth a gweledigaeth rheolwyr y bwrdd iechyd mae'r Dr Dewi Evans.

"Ma' 'na gwestiynau yn ymwneud â'r bobl sy'n rhedeg Hywel Dda. Mae'r holl beth yn hollol ddi-doreth," meddai.

"Mae'r diffyg gweledigaeth a diffyg trefn o ran datblygiadau wedi bod ers degawdau."

Ond yn ôl un o aelodau Senedd yr ardal mae yna angen am ysbyty newydd a fyddai'n dod ag amryw o fanteision i'r gorllewin.

"Mae angen yn y rhan hon o Gymru ysbyty newydd sy'n gallu rhoi y cyfleoedd ymchwil arbennig sy'n mynd i ddenu clinigwyr ac arbenigwyr i'r ardal yma i weithio," meddai Cefin Campbell, AS Plaid Cymru.

"Ond hefyd sy'n gallu cynnig cyfarpar a'r defnydd o dechnoleg sydd ddim ar gael yn Nglangwili a Llwynhelyg.

"Mae'n llawer mwy anodd addasu hen adeilad i fod yr hyn ddyle fe fod i anghenion yr oes fodern."

Dywed Bwrdd Iechyd Hywel Dda eu bod yn "glynu wrth argymhellion gwariant y Trysorlys" gan sicrhau bod y gwasanaeth iechyd yn gwneud y gorau o arian cyhoeddus.

Mae yna fanteision hefyd, ychwanegodd, o "edrych yn gyson ar ein strategaeth" sy'n cynnwys edrych ar ddarpariaeth gwasanaethau "cyn edrych ar ddatblygu ysbyty newydd".