³ÉÈË¿ìÊÖ

Mae pris tŷ yng Nghymru wedi codi dros £240,000 ar gyfartaledd am y tro cyntaf, yn ôl Cymdeithas Adeiladu'r Principality.

Fe gynyddodd y prisiau ar gyfartaledd 11.5% yn ail chwarter 2022, o gymharu â'r flwyddyn flaenorol.

Ym Mlaenau Gwent roedd y codiad pris uchaf ymhlith awdurdodau lleol - cynnydd o 20.6%.

Dywedodd asiant tai yng Nglynebwy, Jeanne Fry-Thomas, fod y farchnad dai yn "boncyrs" ar hyn o bryd.

Mae mynegai prisiau tai Cymdeithas Adeiladu'r Principality yn cofnodi gwerthiannau tai rhwng Ebrill a Mehefin 2022.

Yn ogystal â chynnydd blynyddol o 11.5% mewn prisiau, roedd cynnydd o 9% hefyd yn nifer y gwerthiannau.

"Mae Cymru yn parhau i weld rhai o'r codiadau uchaf mewn prisiau tai ar draws y DU," meddai Shaun Middleton, pennaeth dosbarthu Cymdeithas Adeiladu'r Principality.

Pris tŷ ar gyfartaledd yng Nghymru yw £240,635, sef yr uchaf erioed, ac mae'r cynnydd o 11.5% yn golygu bod y pris wedi codi tua £25,000 o'i gymharu â blwyddyn yn ôl.

Mae prisiau tai uchaf Cymru yn Sir Fynwy, gyda'u gwerth ar gyfartaledd yn £368,621 yn ail chwarter y flwyddyn. Roedd prisiau yn y sir i fyny 11.4% ers blwyddyn yn ôl, ond i lawr 0.2% ers y chwarter blaenorol.

Blaenau Gwent oedd â'r cynnydd uchaf ym mhrisiau tai o'i gymharu â blwyddyn yn ôl gyda'r prisiau wedi codi 20.6%. Mae pris tŷ bellach yn £150,284 ar gyfartaledd, ac yn parhau i fod yr isaf yng Nghymru.

Dim ond Sir Ddinbych gofnododd ostyngiad mewn prisiau o gymharu â blwyddyn yn ôl, er iddynt gynyddu o gymharu â'r chwarter blaenorol.

"Mae'r farchnad yn parhau i fod yn eithaf cryf a bywiog yng Nghymru," medd Mr Middleton, ond rhybuddiodd nad oedd hynny o reidrwydd yn newyddion da i bawb.

"Os ydych chi'n byw mewn tÅ· ac yn ystyried symud i gartref llai o faint, mae prisiau cynyddol yn wych.

"Wedi dweud hynny, mae yna brynwyr tro-cyntaf sy'n cael trafferth ymuno â'r farchnad dai. Maen nhw'n gweld cost y tŷ mae nhw am brynu yn cynyddu, sy'n golygu mwy o flaendal mwy o forgais."

Dywedodd Mr Middleton fod perchnogion sy'n edrych ar symud i dÅ· mwy hefyd yn wynebu prisiau uwch.

"Pan fyddwch chi'n ychwanegu cost cynyddol morgeisi, cyfraddau llog cynyddol a chostau cynyddol biliau trydan a thanwydd, mae'n rhoi mwy a mwy o bwysau nid yn unig ar brynwyr tro-cyntaf ond ar deuluoedd yn gyffredinol."

Mae gwerthwyr tai ym Mlaenau Gwent wedi gweld cynnydd mawr yn y galw am dai.

"Mae'n boncyrs. Rwy'n siŵr nad dyna'r term cywir, a dweud y gwir, ond mae'n wallgof. Allwn ni ddim dod dros y peth," meddai Jeanne Fry-Thomas, cyfarwyddwr y gwerthwyr tai Bidmead Cook.

Mae tai yn gwerthu'n gyflym yn eu swyddfeydd yng Nglynebwy a Bryn-mawr.

"Rydym yn rhoi rhywbeth ar werth, ac o fewn diwrnod neu ddau mae gennym fwy nag un prynwr - mae gennym ni nifer o brynwyr yn aros i'w weld a gwneud cynigion arno. Nid yw pethau'n hongian o gwmpas," meddai Ms Fry-Thomas.

Mae gan brynwyr ddiddordeb mewn "pob pris, pob math o dÅ·, pob ardal," a dywedodd Ms Fry-Thomas eu bod yn dod o'r tu allan i'r ardal hefyd.

Parhau i ffynnu?

Mae Shaun Middleton o'r Principality yn rhagweld twf "cyson" er gwaethaf pwysau ar berchnogion tai oherwydd costau byw cynyddol.

"Ar hyn o bryd does dim arwydd ein bod ni'n wynebu gostyngiad ym mhrisiau tai, na chwalfa, na dim byd felly. Mae'r farchnad yn bendant wedi arafu ychydig ond mae'n ymddangos yn llawer mwy cyson.

"Rwy'n meddwl, tra bod hyder yn y farchnad swyddi, a thra bod mwy o alw o hyd am dai na'r cyflenwad sy'n dod, mae'n debyg y byddwn yn parhau i weld y cynnydd cyson hwn," ychwanegodd Mr Middleton.