³ÉÈË¿ìÊÖ

Llwyddodd Eisteddfod Genedlaethol Ceredigion 2022 i dorri record am y swm mwyaf gafodd ei godi erioed gan y gronfa leol.

Fe gododd aelodau lleol £463,671 tuag at gynnal yr ŵyl yn Nhregaron y llynedd.

Mae'r Eisteddfod hefyd wedi cadarnhau i'r brifwyl yn Nhregaron wneud elw o £5,184.

Mae hynny yn cyfateb i 0.01% o wariant yr Eisteddfod, a oedd dros £6m y llynedd.

Yn ôl yr Eisteddfod Genedlaethol, does dim manylion eto am swm y gronfa leol ar gyfer Eisteddfod Llŷn ac Eifionydd eleni gan fod y gronfa yn parhau "yn fyw ac ar agor".

Roedd Eisteddfod Tregaron i fod i gael ei chynnal yn 2020, ond bu'n rhaid gohirio'r ŵyl ddwywaith oherwydd y pandemig.

Oherwydd hynny, fe gafodd y gronfa leol fwy o amser na'r arfer i hel arian.

Ond ar ddiwedd 2019, cyn y pandemig coronafeirws, daeth cyhoeddiad fod y gronfa wedi cyrraedd ei tharged ariannol o £330,000 o fewn ychydig dros flwyddyn.

Rhoddodd Cadeirydd y Pwyllgor Gwaith, yr Aelod o'r Senedd Elin Jones, deyrnged i wirfoddolwyr ardal Ceredigion.

Yn siarad ar Post Prynhawn, dywedodd: "Fe gaethon ni Eisteddfod lwyddiannus iawn llynedd yn dilyn y cyfnod Covid a buodd hi yn dipyn o lwyddiant yn ariannol hefyd.

"Fe fwron ni ein targed cyntaf cyn y cyfnod clo, ac wedyn fe osodon ni darged ychwanegol i'n hunain a godon ni £463,000 ar gyfer yr Eisteddfod."

Ychwanegodd: "Roedd llynedd yn flwyddyn mor anodd gyda chostau'n cynyddu o wythnos i wythnos ar adegau ac felly o ystyried y costau cynyddol yna fe oedd cael rhywfaint o elw yn ganlyniad ardderchog hefyd.

"Mae cyfrannu arian yn her i bawb ar hyn o bryd, ond mae pobl yn awyddus i roi hefyd pan mae 'na achosion da, a phan bod digwyddiadau diddorol gyda phob math o adloniant yn cael eu cynnal.

"Mae pobl i bob pwrpas wedi bod yn awchu am gael cymdeithasu, am gael gwrando ar gyngherddau da, am gael cymryd rhan mewn gwahanol ddigwyddiadau, ac wrth wario rhyw ychydig mae pobl yn cael rhywbeth yn ôl trwy gael amser da."

Ym mis Chwefror dywedodd prif weithredwr yr Eisteddfod bod rhaid edrych ar brisiau mynediad ar gyfer y Brifwyl eleni, wrth i gostau gynyddu.

Ar y pryd, dywedodd Betsan Moses "nad oedd prisiau wedi newid ers pum mlynedd" ond bod pwyslais o hyd ar sicrhau gŵyl "fforddiadwy i bawb".

Bydd yr Eisteddfod Genedlaethol eleni yn cael ei chynnal ger pentref Boduan ym Mhen LlÅ·n, rhwng 5-12 Awst.