³ÉÈË¿ìÊÖ

Mae'n annhebygol y bydd cyfyngiadau coronafeirws yng Nghymru yn cael eu llacio'n sylweddol tan fis Gorffennaf oherwydd pryder am yr amrywiolyn Delta, mae ³ÉÈË¿ìÊÖ Cymru yn deall.

Mae gweinidogion wedi bod yn edrych ar ganiatáu i fwy o bobl gwrdd y tu fewn.

Ond, wrth i achosion godi, dywed ffynonellau na fydd newidiadau mawr yn y rheolau am y pedair wythnos nesaf.

Mae disgwyl i'r Prif Weinidog Mark Drakeford wneud cyhoeddiad ddydd Gwener.

Fe wnaeth gweinidogion y cabinet gyfarfod brynhawn Mercher i drafod y dystiolaeth wyddonol ddiweddaraf.

Cafodd cyfyngiadau ar gynulliadau awyr agored eu lleddfu yn gynharach ym mis Mehefin fel rhan o gyflwyniad graddol o Rybudd Lefel Un - y lefel isaf ar gynllun rheoli coronafeirws Llywodraeth Cymru.

Mae gweinidogion wedi bod yn adolygu'r sefyllfa cyn penderfynu a oes modd llacio cyfyngiadau eraill ar 21 Mehefin.

Mae cyfradd achosion Covid-19 Cymru wedi codi o dan 10 fesul 100,000 o bobl ers dechrau'r mis i 22.

Mae Cymru wedi nodi 100 o brofion positif newydd y dydd ar gyfartaledd yn ystod y saith diwrnod diwethaf, cynnydd sydd i ddisgwyl wrth i gyfyngiadau gael eu llacio, gyda chlystyrau mewn ardaloedd lleol yn gyrru'r cynnydd cyffredinol.

Wrth ymateb i'r adroddiadau diweddaraf, dywedodd arweinydd y Ceidwadwyr Cymreig, Andrew RT Davies, nad oedd y newydd yn syndod.

"Ond rwy'n gobeithio bod gweinidogion Llafur yn ystyried lleddfu rhai o'r cyfyngiadau ar ddigwyddiadau mawr fel priodasau ac angladdau, a allai, diolch i'r cynllun brechu gwych, gael rhywfaint o hyblygrwydd," meddai.

"Ac yng ngoleuni'r cyfyngiadau parhaus, mae'n amlwg y bydd angen mwy o gymorth ariannol ar fusnesau hefyd a dylai'r Prif Weinidog egluro pa gyllid ychwanegol y bydd ei lywodraeth yn ei ddarparu i amddiffyn swyddi Cymru."