³ÉÈË¿ìÊÖ

Mae arweinydd Plaid Cymru wedi dweud ei bod yn "hynod ddrwg" ganddo os yw'r iaith ddefnyddiodd e wrth alw ar Lywodraeth y DU i ddigolledu Cymru wedi peri loes i rai.

Mewn erthygl ar-lein ac mewn araith mewn cynhadledd roedd Adam Price wedi defnyddio'r gair Saesneg 'reparation' wrth alw am i'r DU dalu iawndal i Gymru wedi canrif o gael ei "gwthio i ddyfnderoedd tlodi."

Mewn cyfweliad ar raglen Sunday Supplement ³ÉÈË¿ìÊÖ Radio Wales dywedodd Mr Price ei fod yn credu bod Cymru wedi dioddef o dan drefn ymddiriedolaeth. Ond, ychwanegodd fod Cymru hefyd wedi chwarae ei rhan mewn caethwasiaeth a chreu trefedigaethau.

Dywedodd Mr Price ers yr erthygl ei fod wedi dysgu fod y gymuned ddu ac ethnig yn teimlo yn gryf y dylai'r term 'reparation' ond cael ei ddefnyddio yng nghyd-destun iawndal o ganlyniad i fasnach caethwasiaeth ac ymerodraethau gwledydd y gorllewin.

"Rydym wedi bod yn ddioddefwr o ran y drefn drefedigaethol, ond rydym hefyd wedi chware rhan yn drefn, a dyw hynny heb gael digon o sylw yn y stori ry'n ni yn ei hadrodd i'n hunain," meddai wrth raglen Sunday Supplement.

Pan gafodd ei holi am ei ddefnydd o eiriau, ac a ddylai fod wedi cymharu ymerodraeth a chaethwasiaeth i brofiad Cymru, dywedodd nad oedd modd cymharu un math o ddioddef neu anghyfiawnder mewn un lle i le arall.

"Os ydw i wedi achosi loes oherwydd fy newis gwael o eiriau, mae'n wir ddrwg gen i am hynny."