Coron i awdur y darllenydd cyffredin
Ysgrifennu i'r darllenydd cyffredin y mae Debbie Anne Williams, enillydd coron Eisteddfod Genedlaethol yr Urdd eleni.
Dyna ddywedodd y ferch 22 oed o Borthmadog, wrth ddod oddi ar lwyfan y brifwyl ddydd Gwener. Mae Debbie yn astudio gradd ymchwil Mphil yn rhan amser ar y pwnc 'Rhyddiaith i Ennill' ym Mhrifysgol Aberystwyth, a dyna yn union a wnaeth i gipio'r Goron, ysgrifennu tri darn o ryddiaith ar y testun Llwybrau .
"Dw i'n edrych ar y llenorion a enillodd y Fedal Lenyddiaeth yn yr Eisteddfod Genedlaethol yn y 1990au ar gyfer fy ymchwil Mphil, ac yn sylwi eu bod nhw'n ysgrifennu yn fwy uchelgeisiol nag awduron eraill, ac yn fwy academaidd. Mae'r llyfrau yn fwy fel rhai i'w hastudio yn hytrach na'u mwynhau," meddai Debbie, sy'n credu efallai y bydd yn gwneud ambell i elyn yn y byd llenyddol yn y dyfodol, pan gyhoeddir ei gwaith ymchwil!
Ond mae Debbie "ar ochr y darllenydd cyffredin," ac roedd y ganmoliaeth i'w gwaith ym meirniadaeth Branwen Jarvis a Emyr Davies yn profi hynny
Ysgrifennu tri darn o ryddiaith mewn ffurfiau gwahanol ar y testun Llwybrau, oedd tasg y gystadleuaeth, ac roedd y tri testun gwbl wahanol a ddewisodd Debbie, yn rhannol bersonol, ac yn rhannol ddychmygol, "yn llawn haeddu'r wobr gyntaf ar Goron."
Ymson y dyn noeth!
"Dydi'r ymson wnes i sgrifennu ddim yn bersonol, mae'n s么n am ddyn noeth mewn parc! Neu a ydy'r dyn yn noeth? Mae ychydig yn amwys," meddai Debbie.
Sioc i Nain
Roedd Debbie wedi llwyddo i gadw'r gyfrinach, mai hi oedd enillydd y Goron wrth bawb, ond ei rhieni, cyn y seremoni, a doedd ei Nain na'i chwaer, oedd yn eistedd yn y gynulleidfa yn y pafiliwn pan gododd ar ei thraed, yn gwybod dim am ei champ, ac fe gafon nhw dipyn o sioc! "Fe enillais i Dlws Coffa Elin Mair heddiw am ysgrifennu adolygiad o'r nofel 'Y Goeden Wen' gan Sonia Edwards, a dyna pam oedd Nain yn meddwl ein bod ni yno," meddai Debbie.
"Y cyfan welais i pan godais i ar fy nhraed yn y pafiliwn oedd bys yn pwyntio ata i, dw i'n meddwl bod Nain wedi cael dipyn o sioc!"
Er bod Debbie wedi ennill nifer o dlysau mewn Eisteddfodau lleol ar hyd y blynyddoedd, dyma'r tro cyntaf iddi gystadlu yng nghystadleuaeth y Goron, ac roedd yn falch iawn i fod wedi ennill, meddai.
Mae Debbie newydd ddechrau swydd gyda Menter Iaith Gwynedd fel Swyddog Ieuenctid a'r Gymraeg, ac mi fydd yn olygydd ar gylchgrawn i bobl ifanc ym mhappur bro Yr Wylan cyn hir. Does ganddi ddim cynlluniau pendant eto, lle fydd yr awen yn mynd 芒 hi, a beth fydd yn ysgrifennu nesaf.
