³ÉÈË¿ìÊÖ

O Fand Pres Llareggub i arwain Cerddorfa Genedlaethol Gymreig y ³ÉÈË¿ìÊÖ, mae Owain Roberts yn hen gyfarwydd â cherddoriaeth amrywiol, a llawer o offerynnau!

Y prosiect diweddaraf mae’n ei arwain yw cyngerdd arbennig yn Pontio, Bangor efo neb llai nag Eden ar gyfer ³ÉÈË¿ìÊÖ Radio Cymru. Fo sydd wedi trefnu’r gerddoriaeth i’r gerddorfa. Cafodd Cymru Fyw sgwrs efo Owain cyn y cyngerdd mawr.

Dwi cofio mynd efo Dad i bigo fyny fy mrawd mawr o ymarfer band pres Porthaethwy a jyst disgyn mewn cariad gyda sain grŵp mawr o gerddorion mewn ystafell.

Fel llawer o Gymry eraill, ges i gyfleoedd cerddorol arbennig yn yr ysgol gydag eisteddfodau a ballu ond dwi’n gweld fy hun yn dipyn o late developer mewn sawl ffordd gan dim ond yn fy arddegau hwyr nes i fynd yn hollol obsessed gyda cherddoriaeth.

Mae cerddoriaeth gerddorfaol fel rhywfath o binacl cerddorol mewn sawl ffordd, ond fel bachgen ifanc mae’n siŵr mai sain ffilmiau fel Star Wars ac Indiana Jones gyda thraciau sain anhygoel John Williams ’naeth ddangos imi botensial a phŵer cerddoriaeth gerddorfaol.

²Ñ²¹±ð’r palette lliwiau y mae cerddorfa yn ei gynnig yn hynod ddeniadol a chyffrous a dwi’n credu fod gan y gerddorfa le arbennig yng nghalonnau cynulleidfaoedd.

Mae trefnu unrhyw ddarn yn gofyn i mi adnabod y gerddoriaeth yn drylwyr, sy’n golygu gwrando lot ar y traciau ac yn aml mynd i’r gwely yn eu canu nhw yn fy mhen! Ond dwi bob tro yn dechrau bob prosiect gyda’r teimlad ’mod i heb ddim clem lle i ddechrau...

Dwi wedi bod yn lwcus i gael gweithio ar amrywiaeth o brosiectau yn y gorffennol – o gerddoriaeth bop, lladin-americanaidd, roc trwm, gwerin, cerdd dant ayyb.

²Ñ²¹±ð’r arddull cerddorol, costau, maint y gerddorfa, y lleoliad, amser, a chyfyngiadau niferus eraill yn aml yn siapio project. Ond yn aml, mae cael y cyfyngiadau yma yn adio i’r elfen greadigol mewn rhyw ffordd ac yn aml gwneud y prosiect yn unigryw.

Yn y gorffennol, dwi’n ffeindio bod cerddoriaeth syml sy’n ailadroddus yn gofyn lot mwy oddi wrtha’ i o ran fy ochr greadigol ac weithiau mae swydd felly yn troi yn fwy o job gyfansoddi yn hytrach na threfnu cerddoriaeth.

Mae cerddoriaeth pync a dawns yn aml yn gofyn i mi gyfansoddi adrannau cyfangwbl newydd er mwyn adio diddordeb i’r hyn sy’n digwydd. Dwi wrth fy modd gallu adio i ganeuon a bob tro yn ceisio gwneud rhywbeth gwahanol gyda’r gerddoriaeth.

Dwi’n teimlo mymryn o bwysau arna’ i pan dwi’n trefnu cerddoriaeth pobl eraill – dwi eisiau iddynt fod yn hapus gyda sut dwi wedi siapio’u caneuon.

²Ñ²¹±ð’r gerddoriaeth yn aml yn hynod bersonol iddyn nhw felly dwi angen bod yn ofalus ’mod i ddim yn ’neud smonach o’u caneuon! Ond mae pobl hefyd yn disgwyl clywed rhywbeth newydd, felly mae angen dod o hyd i’r cydbwysedd.

Dwi fwyaf cartrefol yn creu cerddoriaeth yn hytrach na’i berfformio – mae perfformio yn ail bob tro i’r creu ac yn rhyw fath o necessary evil i fi mewn sawl ffordd.

Y mantais o gael arwain ydi mod i’n cael cyfle i siapio’r deunydd dwi wedi ei greu a dwi’n mwynhau hynny yn fawr.

Wel, yn gyntaf dwi’n teimlo’n hynod lwcus bob tro dwi’n cael gweithio efo’r gerddorfa!

Ond mae o’n bonws pan mae’r grŵp mor dalentog, proffesiynol a lyfli ag Eden! Ac ar ben hynny mae ganddyn nhw gatalog o ganeuon penigamp sy’n llawn amrywiaeth. Fedra’ i’m gofyn am fwy rili. Biti mai dim ond un perfformiad fydd.