³ÉÈË¿ìÊÖ

Ni fydd Ethan Ampadu, Tom Lawrence na Sam Vokes ar gael i Gymru ar gyfer y gemau yn erbyn Trinidad a Tobago a Slofacia yr wythnos yma oherwydd anafiadau.

Yn ogystal, ni fydd chwaraewr canol cae Arsenal, Aaron Ramsey ar gael ar gyfer y gêm yn erbyn Trinidad a Tobago ar y Cae Ras yn Wrecsam.

Ond dywedodd y rheolwr Ryan Giggs y bydd Ramsey yn holliach i herio Slofacia yng Nghaerdydd ddydd Sul.

Mae Cymru wedi bod yn ymarfer yng nghyfleusterau Manchester United cyn y gêm yng ngogledd Cymru nos Fercher.

Yna bydd y tîm yn teithio i'r brifddinas cyn dechrau eu hymgyrch i gyrraedd Euro 2020 brynhawn Sul.

Ni wnaeth Ramsey gymryd rhan ym mharatoadau'r garfan ddydd Mawrth gan ei fod yn cael triniaeth am anaf.

Roedd David Brooks, Daniel James a James Lawrence yn ymarfer ar wahân i weddill y garfan ddydd Mawrth ond mae disgwyl iddyn nhw fod ar gael ar gyfer y ddwy gêm.