³ÉÈË¿ìÊÖ

Mae Prif Weinidog Cymru Mark Drakeford yn barod i gefnogi refferendwm arall os na all Aelodau Seneddol ddod i gytundeb dros Brexit.

Dywedodd Mr Drakeford y byddai Brexit heb gytundeb yn "cael ei deimlo gan bawb".

Fe wnaeth gweinidogion Llywodraeth Cymru rybuddio am oblygiadau Brexit heb gytundeb mewn cyfarfod yn y Senedd ddydd Mawrth.

Cyhuddodd arweinydd UKIP Gareth Bennett y llywodraeth o godi bwganod, a dywedodd yr AC Ceidwadol, Darren Millar bod ymgyrch gweinidogion i frawychu'r cyhoedd "ar steroidau".

Dywedodd arweinydd Plaid Cymru, Adam Price, bod realiti TÅ·'r Cyffredin yn gwneud cynllunio wrth gefn ar gyfer Brexit heb gytundeb yn angenrheidiol.

Mewn symudiad anarferol cafodd mwyafrif o fusnes y Cynulliad am y diwrnod ei ganslo er mwyn gwneud lle am ddatganiadau am ddarpariaethau Brexit.

Daw hyn wedi i gytundeb y Prif Weinidog, Theresa May i adael yr UE gael ei wrthod gan ASau.

Dywedodd Mr Drakeford mai'r trafod dros yr wythnos nesaf yw'r "cyfle olaf" i greu cytundeb Brexit sy'n galluogi'r DU i barhau yn y farchnad sengl a'r undeb tollau.

"Os na ellid gwneud hynny, os na all y Senedd gytuno ar safbwynt mwyafrifol sy'n diogeli ein buddiannau economaidd dros y tymor hir, mae gadael 'heb gytundeb' yn gam mor ddifrifol fel ein bod yn gorfod wynebu mai'r unig opsiwn sydd ar ôl yw pleidlais gyhoeddus arall i ddatrys yr anghytundeb llwyr," meddai.

Cyn y datganiadau fe wnaeth Prif Weinidog Cymru, Mark Drakeford gyhuddo Mrs May o "fwrw ymlaen yn hollol ystyfnig â dim ond mân newidiadau i'w chytundeb aflwyddiannus".

"Dylai caniatáu'r sefyllfa drychinebus o ymadael heb gytundeb fod y tu hwnt i unrhyw Lywodraeth y Deyrnas Unedig, ac mae'n rhaid i'r Prif Weinidog wrthod yr opsiwn hwnnw yn llwyr ac ymestyn Erthygl 50," meddai.

"Byddai hynny'n rhoi amser i Lywodraeth y Deyrnas Unedig newid cyfeiriad ac ymrwymo i ailagor y trafodaethau gyda'r Undeb Ewropeaidd i sicrhau Brexit sy'n amddiffyn swyddi a'r economi."

Ychwanegodd Mr Drakeford bydd ei weinidogion yn amlinellu'r "gwir risg o Brexit di-gytundeb ar iechyd, yr economi, trafnidiaeth a ffermio".

Cafodd pryderon eu hamlygu ynglŷn â chyflenwad deunyddiau ar gyfer y GIG, amhariad ar gludiant nwyddau a'r rhwystrau i allforion allai fod yn niweidiol i amaethyddiaeth a'r sector nwyddau.