Steddfod Gwilym Owen - dydd Sadwrn
 Fel yr un a gafodd y bai am ddifetha Prifwyl Abergwaun yn wythdeg chwech rydwi'n falch o allu cyhoeddi mod i wedi gadael fy mheiriant creu mwd ar ôl yn y Gogledd - a dydw i ddim wedi dod a'r cwrwgl efo fi i Dyddewi.
A synnwn i ddim na chawn ni Steddfod sych - o dan draed o leia - yn Sir Benfro leni.
Rowan a Robyn
Ac mi all fod yn Steddfod ddiddorol hefyd ar lawer cyfri. Mae Gorsedd y Beirdd fore Llun yn urddo Archesgob Caergaint yn Dderwydd er anrhydedd.
Y tro cynta rioed i'r fath beth ddigwydd. Archdderwydd newydd ac Archesgob newydd, sgwn i sut daw Rowan a Robyn ymlaen efo'u gilydd?
A thybed a fydd yr urddo unigryw fore Llun yn ddigon i berswadio Dillwyn Miles i beidio ag ymddiswyddo o'r Cylch Cyfrin?
Mae o'n dod i'r maes fore Llun i draddodi darlith ar ei atgofion gorseddol ac yn ôl y sôn ei fwriad oedd deud ta ta ar derfyn ei ddarlith i ddatgan ei siom gydag agwedd honedig wrth frenhinol y penbandits presennol.
Ond bellach efallai y bydd ei barch at y Dr Rowan Williams yn ei atal rhag cymryd y cam hwnnw ar hyn o bryd.
Beth bynnag fe gawn ni weld.Chwilio am gowbois
Rydw i wedi treulio peth o'r diwrnod heddiw y tu allan i'r Pagoda, Y Stiwdio ar y Maes a Chapel Ebeneser yn chwilio am bobl yn cyrraedd ar gefn ceffylau ac yn gwisgo hetiau cantel mawr.
Ond welais i neb sy'n profi felly nad ydi cowbois honedig Alwyn Humphreys yn beirniadu cerdd yn y Brifwyl hon.
Sori partner, Al!
Clefyd y Sianel
Dw i ddim isio colbio S4C ein sianel hoff - mae'r Western Mail wedi gneud digon o hynny heddiw. Ond tybed a ydi'r Steddfod wedi cael peth o glefyd y Sianel - y clefyd o ail dwymo ac ail ddangos.
Leni yn y Babell Lên mae yna gyfle i Steddfodwyr wrando am yr eildro ar un o ddarlithiau niferus Yr Athro Hywel Teifi Edwards. - honno am Steddfod y Jiwbili yn Llundain ym mil wyth wyth saith.
Ai dyma ffordd y Babell o ddathlu Jiwbili y Cwin?
SianeluA chan imi gyfeirio at S4C mi ofynna i gwestiwn bach. Oes yna rywbeth annisgwyl wedi digwydd i Gylch yr Iaith?
Gweld mai prif weithgaredd steddfodol y Cylch leni ydi darlith ar Ddyfodol Darlledu yng Nghymru gan Euryn Ogwen Williams.
Dim byd o le ar hynny meddach chi: Wel nag oes - dim ond peidio anghofio mai'r Bonwr Williams oedd pennaeth rhaglenni S4C pan anwyd y rhaglen nosweithiol Heno' - y rhaglen a fu'n gymaint o dân ar groen y Cylch pan oedd o'n gorff ffyrnig go iawn.Ffyrnigrwydd
A pharhau gyda ffyrnigrwydd - mae yna bryder y gallai dyn go ffyrnig fod yn cerdded y maes yma.
Gwr o'r enw Iorwerth Fain ap Ieuan sy wedi bod yn llythyru efo'r Archdderwydd. Sgwennu mae o medda fo ar ran Cymdeithas Caredigion Alltud Gwalia Wen ym Mafaria.
Mae nhw am weld sefydlu Gorsedd ym Mafaria fel yr un a gafodd pobl Patagonia y llynedd.
Fe ymddengys fod agwedd Iorwerth Fain ap Ieuan yn eitha bygythiol a bod yna gadw llygad barcud amdano ar hyd a lle y maes.
Os ydach chi'n ei nabod o, neu wedi weld o rhowch wybod i Geidwad y Cledd.
Fo ydi'r dyn i ddelio efo fo yn ôl y sôn.
Hollt grefyddol
A chwestiwn bach i orffen, ryda ni i gyd wedi clywed am Damien Hist y dyn sy'n ennill gwobrau mawr celfyddydol am hollti anifeiliaid a rhoi mewn fformaldeheid.
Rwan wele brif enillydd celf yn Steddfod Penfro yn cael gwobr am hollti Beibl y teulu yn ddarnau mân - ymhlith pethau eraill wrth gwrs.
Ie - Anrhydeddu Archesgob a damo'r Beibl; mae lle i bopeth yn ein prifwyl ni
Gwilym Owen.
|
