Diwrnod y dagrau ac unwaith eto yng Nghymru annwyl ydi dydd Iau yn y Brifwyl bellach.
Diwrnod croesawu y Cymry ar ddisberod.
A thybed ai leni fydd y tro olaf inni weld y seremoni sentimental hon yn ei ffurf bresennol ar lwyfan y Steddfod?
Mae un o adar drycin y Cyngor o tua Llangwm 'na yn galw am addasu'r Sioe. Dyn dewr iawn ddeudwn i.
Dewinol Ac o sôn am dramorwyr - fe ymddengys fod 'na lanc go ddychmygus wedi cyfarfod Robin Llyn yr Archdderwydd yn un o westai'r cylch a bod yr Archdderwydd wedi esbonio ei swyddogaeth eisteddfodol iddo fo.
Ychydig yn ddiweddarach daeth y llanc wyneb yn wyneb ag un o aelodau'r Cynulliad Cenedlaethol ac medda fo wrth hwnnw,"I've just met your Grand Wizard.
A dyna ni'n ôl efo Klu Klux Khan eisteddfodol - oll yn eu gynau gwynion.
Ffrindiau annwl Cwestiwn bach rwan. Be ddigwyddodd i'r syniad o sefydlu mudiad newydd o'r enw Ffrindiau'r Steddfod. Faint o ffrindiau sy gan y Brifwyl. Ydi o'n wir nad oes gan y swyddogion y syniad lleiaf faint sydd yna?
Ac yn ola - fydda fo ddim yn ddoethach cyfadde mai methiant llwyr fu'r freuddwyd ac mai gwell fyddai ei gladdu a chael gwared o'r dryswch.
Wedi drysu Ac mae'r gair yna yn dod a fi at Elwa - y corff addysgol enfawr sydd a ffortiwn o gyllideb ond i wneud beth does neb yn sicr iawn.
Ac o flaen eu stondin eisteddfodol mae yna hysbyseb yn gwahodd pobl i gerdded drwy eu "Drysfa".
Gair ardderchog i ddisgrifio Elwa ei hun ddeudwn i.
Meddwi ar lyfr Dwi am roi gwobr fach rwan i Robat Gruffudd o'r Lolfa a benderfynodd mai'r unig ffordd o werthu un o'i gyfrolau newydd oedd cynnig potel o gwrw i bob prynwr. A phan gafodd gerydd gan Gyfarwyddwr y Steddfod fe ymddiheurodd a deud ei fod o'n credu mai gwerthu alcohol ac nid rhannu alcohol oedd wedi ei wahardd.
Iechyd da Robat a derbyniwch wobr diniweidrwydd clyfar.
Hapusrwydd Y dyn hapusa ydw i wedi weld ar y maes yma eleni yn sicr ydi Karl Davies cyn Brif Weithredwr The Party of Wales sy bellach yn bugeilio Prifathrawon Cymru fach.
Wyddoch chi be, medda fo, dwi'n cysgu'r nos am y tro cynta ers blynyddoedd. Dyn yn amlwg wedi cael gwared o faich trwm iawn.
Neges ddigidol Un o'r criw bychan a aeth i wrando ar ddarlith Euryn Ogwen i Gylch yr Iaith ddoe oedd Ned Thomas a phan oedd y darlithydd ar ganol ei druth dechnegol ddigidol dyma dinc ffôn mudol.
A'r dywededig Ned yn rhuthro allan. A rhai yn holi tybed ai Rupert Murdoch oedd yn galw i gael gwybod pryd yn union y gwelir y rhifyn cynta o'r papur dyddiol Cymraeg. Wedi'r cyfan dim ond Ned sydd â'r wybodaeth honno.
Iechyd annwl Gwobr arall rwan am weld ei gyfle i'r Dr Dai Lloyd - llefarydd Plaid Cymru ar faterion iechyd. Y fo oedd un o'r rhai cyntaf i arwyddo deiseb yn galw am gael gwared o stondin gwerthu sigarets ar y maes yma. Ac wrth gwrs gwneud yn sicr fod y Western Mail yn clywed am ei wrhydri. Neis wan Dai.
Gwrthod y lliw A gair o gydymdeimlad i orffen efo'r Athro Hywel Teifi Edwards. Nid yn aml y mae o'n methu cael ei faen i'r wal. Ond mae Bwrdd yr Orsedd wedi gwrthod ei gynnig lliwgar i newid trefn anrhydeddau y Cylch Cyfrin.
Rhoi cobanau glas a gwyrdd bob yn ail flwyddyn oedd bwriad y cynnig - ond no we hose meddai'r mwyafrif. Chlywais i ddim beth oedd ymateb yr Athro.
Diwrnod y dagrau ac unwaith eto yng Nghymru annwyl ydi dydd Iau yn y Brifwyl bellach. 
