���˿���

Un o brif themâu’r gerdd hon yw bygythiad i’n hetifeddiaeth. Mae ein gwlad a’r iaith Gymraeg dan fygythiad oherwydd dylanwadau estron. Dim ond at rai enghreifftiau y mae’r bardd yn cyfeirio, fel y llyfr Saesneg i ymwelwyr, y ‘Betws Guide’ a’r pecyn o ‘Walkers’ Crisps’.

Daw’r bygythiadau hyn ar ffurf ymwelwyr yn ogystal â mewnfudwyr oherwydd bod enwau Saesneg lleoliadau yn aml yn disodli’r enwau Cymraeg gwreiddiol. Pryder y bardd yw y bydd enw Cymraeg y coed, sef ‘Coed Llugwy’, yn araf ddiflannu oherwydd y defnydd cyson o ‘Walkers’ Wood’. Mae’r enw Cymraeg yn gyfoethocach na’r enw Saesneg am ei fod yn cyfeirio at yr afon Llugwy ac yn cyfleu perthynas agos y goedwig a’r ardal.

Darlunnir perthynas agos tad a mab yn y gerdd hon yn ogystal, wrth i’r tad fynd â’i fab am dro yn y goedwig. Gwelwn gefn gwlad Cymru ar ei orau hefyd a chyfeiriadau lu at hyfrydwch naturiol byd natur gyda’r cyfeiriadau at liwiau’r hydref:

Mae popty’r hydref wedi’u rhostio, was, / A’u taenu’n wledd ar hyd y llawr.

Mesur

Cerdd rydd mewn mydr ac odl yw hon.

Mae’r llinellau yn amrywio o ran sillafau ond mae dau guriad ymhob llinell. Mae llinell 2 a 4 yn odli ymhob pennill.

Mae Myrddin ap Dafydd yn odli geiriau Cymraeg a geiriau Saesneg ar ddau achlysur – ‘Taid’ a ‘Guide’; ‘mwd’ a ‘Wood’ er mwyn pwysleisio dylanwad y Saesneg ar yr ardal.