³ÉÈË¿ìÊÖ

Tha e a' sìor fhàs coltach a-nise gun tèid Caley Thistle ann an rianachd, a rèir na chuala luchd-leantainn aig coinneimh oidhche Luain.

Chaidh a' choinneamh a ghairm an t-seachdain seo chaidh nuair a dh'innis an cluba gum feum iad £200,000 a thogail ron t-16mh den mhìos gus rianachd a sheachnadh.

Bha mu 200 neach an làthair aig Pàirc Chaledonian 'son cluinntinn bho stiùirichean a' chluba agus eòlaichean ionmhais.

Chaidh innse dhaibh gun tèid an cluba ann an rianachd mura tèid neach no buidheann anns an gabh earbsa a chur a lorg ro dheireadh na ath-sheachdain.

Is bha rabhadh ann gum biodh beagan bhliadhnaichean doirbhe air thoiseach air ICT ma thèid iad ann an rianachd, a thuilleadh air a bhith a' call 15 puingean san lìog sa bhad ma thachras e.

"Tha D-Day romhainn aig deireadh na ath-sheachdain is mura faigh sinn tairgse freagarrach 's e rianachd a bhios ann," thuirt an cathraiche ùr eadar-amail, Scott Young.

"Nì am bòrd an co-dhùnadh is mura h-eil an t-airgead ann chan eil dol às ann. Sin as coireach gu bheil sinn a' stèidheachadh deireadh na ath-sheachdain mar cheann-là 'son toiseach pròiseas na rianachd mura tig an tuilleadh airgid," thuirt e.

Thòisich an cluba iomairt maoineachaidh an t-seachdain seo chaidh feuch £200,000 a thogail bhon luchd-leantainn gus rianachd a sheachnadh.

Aig an ìre seo tha còrr is £70,000 air a thogail.

Chuala a' choinneamh gun tèid cuid den airgead sin a chleachdadh airson pàigheadh airson rianachd ma 's e is gur e a thachras, is Ailean Savage fhèin ag ràdh gum biodh esan deònach £300,000 eile a chur a-steach cuideachd.

Thuirt Mgr Savage gur dòcha gur e rianachd an roghainn a b' fheàrr a th' ann aig an ìre seo.

Bha càineadh ann cuideachd air an fheadhainn a bha a' riaghladh Chaley Thistle anns na bliadhnaichean mu dheireadh, is cuid a tha fhathast air a' bhòrd bhon àm ag aideachadh nach deach sùil a chumail air gnothaichean mar a bha còir.

Tha luchd-taic mothachail gur e fìor staing a th' ann.

"Bheir e bliadhnaichean," thuirt Eardsaidh MacIlleathain a tha a' leantainn Chaley Thistle.

"A' coimhead air clubaichean a chaidh tron phròiseas a tha seo, tha e a' toirt deannan bhliadhnaichean.

"Tha e a' ciallachadh gum feum taic ionmhais a bhith ann dhan chluba agus luchd-leantainn a bhith a' cur taic riutha - agus cuideachd gu bheil iad a' togail sgioba às ùr."

Ach tha Mgr MacIlleathain ag ràdh gu bheil dòchas ann fhathast, a dh'aindeoin cho dubhach 's a tha an gnothach.

"Tha clubaichean eile air a dhol tron phròiseas seo is air tighinn a-mach aig a' cheann eile gu math nas fheàrr is nas fhallaine, ach chan eil e tlachdmhor sam bith aig an àm seo a bhith mar phàirt dheth sin."