Tuath-gaoithe coimhearsnachd ga leasachadh an ceann a tuath Leòdhais

Tùs an deilbh, Getty Images

Tiotal an deilbh, Ma thèid an tuath-gaoithe airson mòinteach Bharabhais air adhart 's e am fear coimhearsnachd as motha am Breatainn a bhios ann

28 An t-Samhain 2024

Tha trì uachdarain phoblach an Leòdhas ag obair còmhla airson plana a chur air adhart airson tuath-gaoithe a thogail air mòinteach Bharabhais a bheireadh teachd a-steach seasmhach do gach coimhearsnachd.

Tha Urras Oighreachd Ghabhsainn, Urras Oighreachd Bharabhais agus Urras Oighreachd Chàrlabhaigh air companaidh a stèidheachadh air a bheil Cumhachd Coimhearsnachd a' Chost an Iar Earranta airson am pròiseact a thoirt gu buil.

Thathar a' moladh naoi crainn-gaoithe cho àrd ri 110 meatair airson na làraich air a' mhòintich faisg air Barabhais agus a chruthaicheas 43 MW sa bhliadhna.

Chaidh gabhail ri barrantas bhon chompanaidh cumhachd SSEN san t-Sultain gum bi àite gu leòr air a' chàbal-mhara airson na thèid a chruthachadh de dhealan a chur a thìr-mòr.

Tha dùil gum bi ceangal ann ris a' Ghriod Nàiseanta san Dàmhair 2033.

Ma thèid e air adhart 's e an tuath-gaoithe coimhearsnachd as motha a bhiodh san Rìoghachd Aonaichte.

Tùs an deilbh, GEOGRAPH/CLAIRE PEGRUM

Tiotal an deilbh, Tha tuath-gaoithe Urras Oighreachd Ghabhsainn a' toirt dhaibh teachd a-steach neo-eisimeileach

'S e Urras Oighreachd Ghabhsainn an aon uachdaran coimhearsnachd sa bhuidhinn a tha a' faighinn teachd a-steach neo-eisimeileach bho na trì crainn-gaoithe a th' aca ann am Baile an Truiseil.

Tha sin a' ciallachadh gu bheil e comasach dhaibh 15 luchd-obrach fhastadh agus sgeamaichean a chùm maith an luchd-còmhnaidh a ruith.

'S e Urras Oighreachd Ghabhsainn a bhios os cionn a' phròiseict air sgàth na th' aca de eòlas agus goireasan.

Thuirt an Cathraiche, Agnes Rennie: "Tha buannachdan mòra air a bhith an cois nan crainn-gaoithe ann am Baile an Truiseil dhan sgìre agus tha Urras Oighreachd Ghabhsainn toilichte gun tèid againn air an eòlas againn a chur gu feum airson am pròiseact cudromach seo a leasachadh."

Thuirt Cathraiche Cumhachd Coimhearsanchd a' Chosta an Iar Earranta, Dàibhidh Mac a' Mhaoilein: "An dèidh nan draghan a nochdadh mu na tha de rùm air a' ghriod b' e iongnadh a bh' ann gun d' fhuair sinn ceangal cinnteach, agus tha seo air cabhag a chur sa phròiseact.

"'S e seo a' chiad ìre agus feumaidh sinn a bhith ag obair còmhla ri buidhnean maoineachaidh agus eòlaichean teicnigeach airson adhartas a dhèanamh sna mìosan agus bliadhnaichean ri teachd."

Bidh cothrom aig luchd-còmhnaidh ann an sgìrean nan trì urrasan barrachd fhaighinn a-mach mun phlana aig sreath choineamhan an ath-seachdain.

Gheibhear barrachd fiosrachaidh air an làraich-lìn aig .