³ÉÈË¿ìÊÖ

Siria

Tha an Rìoghachd Aonaichte air brath fhoillseachadh cuide ris an Fhraing, a' Ghearmailt agus na Stàitean Aonaichte agus iad airson 's gun rachadh an teas a thoirt às a' chòmhstrì ann an Siria. Tha buidhnean reubaltach air smachd fhaighinn air pìosan mòra de cheann a tuath na dùthcha anns na beagan làithean mu dheireadh. Tha feachdan adhair Shiria, le taic na Ruis, air a bhith a' toirt ionnsaigh air na reubaltaich ann an oidhirp bacadh a chur air an adhartas aca.

Hunter Biden

Rinn cuid de Phoblachdaich càineadh air a' Cheann-Suidhe Biden airson mathanas oifigeil a thoirt do mhac às dèidh dha ràdh roimhe nach dèanadh e sgath dhe shèorsa. Bha dùil ri binn air Hunter Biden às dèidh dha a bhith air a dhìteadh air casaidean gun do cheannaich e gunna gu mi-laghail, 's gun do sheachain e cìsean a phàigheadh. Thuirt an Ceann-Suidhe Biden gun robh gnothach poileataigeach ri mar a chaidh a mhac a dhìteadh, 's gur e ana-ceartas a bh'ann.

Eucoir eagraichte

Tha dùil ri sianar fhireannach, eadar 20 agus 40 bliadhna a dh'aois, aig cuirt an t-Siorraidh an Glaschu an-diugh fhathast an co-cheangal ri eucoir eagraichte agus ecuoir dhrugaichean. Thuirt Poileas Alba gu bheil iad am measg ochdnar a chaidh a chur an greim Dihaoine seo chaidh ann an Glaschu, Camas Lang, Gart Cois, Barrhead, Rinn Friù, agus Baile an t-Salainn mar phàirt de rannsachadh fad ochd mìosan deug. Chaidh fear, 29, agus boireannach, 27, a chur an greim cuideachd ach chaidh an saoradh fhad 's a tha tuilleadh rannsachaidh ga dhèanamh.

Galar

Tha Bòrd Slàinte Roinn a' Mhonaidh air casg rè ùine a chur air luchd-tadhail aig Ospadal an Dr Gray ann an Eiliginn, às dèidh do thinneas stamaig nochdadh ann. Tha e a' toirt buaidh air còrr air 50 euslainteach is neach-obrach agus thuirt am bòrd-slàinte gu bheil iad air trì uàrdan a dhùnadh tàilleabh an t-suidheachaidh.

Dàibhear a dhìth

Tha dùil ri buidheann sònraichte poileas an Arcaibh an-diugh fhathast gus cuideachadh leis an iomairt feuch lorg fhaighinn air dàibhear a th' air a dhol a dhìth. Chunnacas an duine, a tha na iasgair coimearsalta son creachain, mu dheireadh fhad 's a bha e ag obair ann an sgìre Scapa Flow Diciadain.