³ÉÈË¿ìÊÖ

Thòisich obair air port-fànais a thogail ann an Uibhist a Tuath.

Dh'innis a' chompanaidh ionadail Macaulay Askernish Eta gun deach am fastadh le Comhairle nan Eilean Siar airson a' chiad bhun-structar a thogail aig Scolpaig airson an làrach ullachadh.

Fhuair a' Chomhairle £947,000 bho Iomairt na Gàidhealtachd 's nan Eilean airson a' chiad earrann den phròiseact, a chosgas £2.6m. Thig £675,000 a bharrachd bho phrògram calpa na Comhairle airson 2023-28.

Thèid rathaidean ùra a chur ris an làraich, a thuilleadh air parcadh, leasachadh air saidhbhearan aig Loch Scolpaig, agus bann-leathann fibre a chur ann.

Cuideachd mar phàirt dheth, thèid sgrùdadh a dhèanamh air na ghabhadh dèanamh airson dualchas cultarail na làraich a ghlèidheadh 's a chleachdadh.

Thuirt Ceannard na Comhairle, Paul Steele: "'S e clach-mhìle nach beag a th' ann am briseadh na talmhainn aig Scolpaig airson na Comhairle agus Spaceport 1.

"Mar an aon làrach san Rìoghachd Aonaichte airson rocaidean fo-orbitail a chur gu fànais, leigidh Spaceport 1 le leasachadh o thoiseach gu deireadh a bhith air a dhèanamh a thaobh saidheans, teicneòlais agus siostaman fànais a dhol air adhart air talamh Breatannach airson a' chiad uair, a' dùnadh beàirn nach beag ann an sèine luach na Fànais.

"Cuirear fàilte air mar a fhuair companaidh ionadail an cùmhnant, agus fàgaidh seo buannachd gu h-ionadail air feadh na ciad earrainn den phròiseact.

"Nuair a bhios e deiseil, cruthaichidh am port-fànais cothrom cosnaidh ann an Uibhist, agus cuiridh e ri amasan nas fharsainne na Comhairle airson nan Eilean."

Chaidh cead a thoirt airson an leasachaidh ann an 2023, le dùil gum bi suas ri 10 rocaidean fo-orbitail gan cur gu fànais gach bliadhna.

Tha companaidh ga sireadh leis a' Chomhairle airson an dàrna earrann den leasachadh a thoirt air adhart.

Tha dùil gun gabhadh a' chiad rocaid a chur suas ron Fhoghar 2025.