³ÉÈË¿ìÊÖ

Chaidh am Bac troimhe dhan chuairt dheireannaich de Chupa Jock Stein nuair a rinn iad an gnothach air Nis 2-1.

Bha sluagh mòr an làthair aig na Còig Peighinnean is chunnaic iad Nis a' dol air thoiseach às dèidh 20 mionaid tro Sheumas 'Titch' Moireasdan.

Bha cothrom aig a' Bhac freagairt cha mhòr sa bhad is breab-peanais air a thoirt dhaibh.

Chuir Dòmhnall MacSuain air oidhirp Fhriseil MhicLeòid ge-tà, is MacLeòid an uairsin a' bualadh a' phuist leis an dàrna oidhirp nuair a bha am ball air tilleadh thuige.

B' e 1-0 do Nis a bh' ann aig leathach slighe.

Targaid

Chùm na Bacaich a' dol ge-tà, agus 's e Friseal MacLeòid a fhuair an tadhal a thug iad air ais co-ionnan tràth san dàrna leth.

Ged a bha cothroman aig an dà sgioba b' e 1-1 a bh' ann às dèidh 90 mionaidean is chaidh iad a-steach gu ùine a bharrachd.

Air a' cheann thall, b' e fear a bha roimhe a' cluich do Nis a chuir an tadhal a chuir am Bac troimhe is Niall Moireasdan air an targaid le cheann aig a' phost-chùl.

Chrìochnaich geama a chòrd ris an luchd-amhairc gu mòr 2-1 dhan Bhac.

Bidh na Bacaich a-nise an aghaidh an seann chàirdean às an Rubha sa chuairt dheireannaich.

Bidh an geama sin air a chluich aig Pàirc Chnoc nan Gobhar oidhche Shathairne aig 6f.