���˿���

Mae ymgyrchwyr yn dweud bod angen cryfhau'r gyfraith sy'n cefnogi'r Gymraeg ar ôl i gwmni parcio preifat ennill ei achos yn erbyn aelod o Gymdeithas yr Iaith.

Roedd Toni Schiavone yn y llys am y pedwerydd tro ar ôl gwrthod talu hysbysiad tâl parcio a gyhoeddwyd yn uniaith Saesneg gan gwmni preifat One Parking Solution (OPS).

Dywedodd Mr Schiavone y byddai wedi costio tua £60 i gyfieithu'r hysbysiad, tra bod y cwmni parcio wedi talu mwy na £14,000 mewn costau cyfreithiol i ddod â'r achos i'r llys dros gyfnod o dair blynedd.

Ar ôl gwrandawiad dwyieithog yng Nghanolfan Cyfiawnder Aberystwyth, dywedodd y Barnwr Rhanbarthol Lowri Williams fod Mr Schiavone wedi cyflwyno achos gonest a moesol, a'i bod yn cytuno y byddai wedi bod yn haws pe bai OPS wedi cyfieithu'r hysbysiad ar y dechrau.

Mae Mr Schiavone wedi dweud yn gyson y byddai wedi talu pe bai wedi ei dderbyn yn Gymraeg neu’n ddwyieithog.

Ond ychwanegodd y barnwr nad oedd gofyniad cyfreithiol ar y cwmni i gyhoeddi'r hysbysiad yn Gymraeg gan fod y ddeddfwriaeth ar y Gymraeg yn berthnasol i gyrff cyhoeddus ac nid i gwmnïau preifat.

'Diffyg difrifol'

Ar ôl y gwrandawiad, dywedodd Mr Schiavone ei fod yn siomedig ond heb ei synnu.

“Mi oedd y ddadl gan OPS yn ymwneud â’r gyfraith o ran cosb parcio. Ond roedd fy nadl i ar sail egwyddor - ar sail fy hawl fel Cymro Cymraeg y dylid fod wedi darparu gwasanaeth trwy gyfrwng y Gymraeg.

"Mae hyn yn dangos diffyg difrifol yn y ddeddfwriaeth fel ag y mae. Roedd y Comisiynydd [y Gymraeg] wedi annog y cwmni yma i ddarparu gwasanaethau trwy gyfrwng y Gymraeg, ond dyw anogaeth mae’n amlwg ddim yn ddigon.”

Gorchmynnodd y llys i Mr Schiavone dalu £170 a llog o £11.90, ac £85 o gostau.

Gwrthodwyd yr hawl i apelio i Mr Schiavone, a dywedodd na fyddai'n gwneud unrhyw daliadau er gwaethaf gorchymyn y llys.