Rydyn ni wedi diweddaru ein Polisi Preifatrwydd a Chwcis
Rydyn ni wedi gwneud newidiadau pwysig i'n Polisi Preifatrwydd a Chwcis ac rydyn ni eisiau i chi wybod beth all hyn ei olygu i chi a'ch data.
Y cyn-ddyfarnwr rygbi Nigel Owens yn ennill gwobr ffermio yn Llundain
Roedd y cyn-ddyfarnwr rygbi Nigel Owens ymhlith yr enillwyr o Gymru mewn noson i wobrwyo ffermwyr Prydain yn Llundain.
Cafodd Owens ei enwi yn Bencampwr Ffermio'r Flwyddyn yng ngwobrau blynyddol Farmers Weekly yn y Grosvenor House Hotel, Park Lane nos Iau.
Ers ymddeol o rygbi yn 2020, mae Owens wedi bod yn canolbwyntio mwy ar ei fferm ym Mynyddcerrig yn Sir Gaerfyrddin.
"Mae hyn yn gymaint o fraint," meddai Owens ar y cyfryngau cymdeithasol wedi'r seremoni.
"Ond dwi'n derbyn y wobr ar ran yr holl ffermwyr sy'n gweithio'n galed i fwydo'r genedl. Diolch o galon."
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen Twitter a cyn derbyn. Er mwyn gweld y cynnwys dewiswch ‘derbyn a pharhau’.
Diwedd neges Twitter
Dywedodd Farmers Weekly fod Owens wedi ei gydnabod am ymgyrchu ar faterion gwledig a phwysigrwydd iechyd meddwl yn y gymuned amaethyddol.
"P’un a yw’n degwch i ffermwyr, yr angen i weithredu ar sicrwydd bwyd, y frwydr yn erbyn TB mewn gwartheg neu’r effaith gadarnhaol a gaiff ffermio ar yr amgylchedd, mae’n eiriolwr penderfynol ac yn hynod haeddiannol o’r wobr hon," meddai Tom Bradshaw, llywydd undeb yr NFU.
Ffynhonnell y llun, Dylan Jones
Roedd yna Gymry eraill yn fuddugol yn y gwobrau hefyd, gan gynnwys Dylan Jones o fferm Castellior ar Ynys Môn a enillodd y wobr Ffermwr Cig Eidion y Flwyddyn.
Rheinallt a Rachel Harries o fferm Llwynmendy Uchaf yn Sir Gâr oedd enillwyr gwobr Ffermwr Llaeth y Flwyddyn.
Enillodd Logan Williams o fferm Tirmynydd yn Sir Gâr y wobr am Fyfyriwr Amaeth y Flwyddyn, tra bod Jonathan Crimes, o Cara Wales, Dyfed, hefyd wedi wobrwyo yn y categori Cynghorydd ar Dda Byw (Livestock Adviser).
