³ÉÈË¿ìÊÖ

Wrth droi yn 50 oed, dychmygwch osod her i'ch hun i redeg milltir yn 50 talaith yr Unol Daleithiau.

Mae'r her yn un enfawr ac yn un fwy byth o feddwl bod Fiona a Hugh Morgan o Fethel ger Caernarfon wedi cwblhau'r gamp mewn tair wythnos yn unig.

Pan drodd Fiona yn hanner cant ym mis Medi, roedd hi eisiau cwblhau her fyddai'n aros yn ei chof am byth.

Mae Fiona a'i phartner Hugh yn rhedwyr o fri ac yn aelodau o glwb Eryri Harriers.

Ar ôl cwblhau Marathon Eryri, roedd y ddau wedi codi pac unwaith eto ac wedi cofrestru i redeg ym Marathon Efrog Newydd a Chicago.

Mae'r ddwy ras dair wythnos ar wahân, felly roedd hi'n gyfle i'r pâr aros yn yr UDA am gyfnod i ddathlu pen-blwydd Fiona, ond gwneud hynny mewn steil.

Roedd y ffigwr 50 yn arwyddocaol iawn a pha well ffordd i ddathlu na ymweld â'r 50 talaith, a rhedeg milltir ym mhob un fel fu'r ddau yn esbonio ar raglen Aled Hughes ar ³ÉÈË¿ìÊÖ Radio Cymru.

"Y syniad oedd rhedeg milltir ym mhob talaith i gynrychioli pob blwyddyn o fy mywyd," meddai Fiona.

Hugh oedd yn gyfrifol am y trefnu a dyma'n troi fyny mewn cwmni teithio lleol gyda map o America i geisio trefnu taith anhygoel o gymhleth o fewn cyfnod gymharol fer o dair wythnos.

"Ro'n i wedi edrych ar y ffordd leiaf o ran amser a milltiroedd i gwblhau'r 48 talaith sydd ar y tir mawr ac roedd hwnna yn dod i 6,500 o filltiroedd.

"Ro'n i eisiau neud mwy na jest dreifio drwy bob state a gan fod Fiona yn 50 ac nid 48, roedd rhaid i ni gyfri Hawaii ac Alaska i mewn i'r mics hefyd," meddai Fiona..

Torri record?

O ran y daith ei hun roedd Fiona yn cyfaddef fod Hugh a Gwyndaf, y trefnwr teithiau, wedi gwneud "plan andros o dda."

"Roedden ni'n landio yn Efrog Newydd ar ddydd Llun ac roedd rhaid i ni fod yn Chicago erbyn y dydd Gwener yr wythnos yna i redeg y marathon dros y penwythnos," meddai.

"Aethon ni drwy 12 state cyn cyrraedd Chicago - dreifio oedd hwnnw.

"Wedyn aethon ni ar bump flight, roedd 'na ddau drên a pump car wedi cael ei hurio ar gyfer gweddill y daith."

Gyda phob talaith yn cynnig rhywbeth gwahanol o ran tirwedd, roedd 'na ambell un sefyll yn y cof fwy nag eraill i Fiona.

"Nes i licio Hawaii, roedd 'na deimlad ein bod ni ar ein gwyliau yno, ond nes i enjoio Alaska hefyd er ei bod hi mor oer yno. Y ddau le yna fyswn i'n rhoi fel fy hoff lefydd," meddai.

O ran rhedeg mewn 50 talaith mewn cyn lleied o amser, dyw Hugh methu dod o hyd i unrhyw record o'r fath yn bodoli fod pâr wedi gwneud hyn gyda'i gilydd.

Mae sawl record yn bodoli o bobl yn gwneud pethau gwahanol o fewn y 50 talaith, ond dim am redeg milltir.

"Rydan ni dal i neud ychydig o ymchwil, roedd o'n rhywbeth arbennig oedden ni eisiau ei neud i ddathlu pen-blwydd Fiona er i sawl un o'n ffrindiau ni ddeud nad oedd o'n bosib," meddai Hugh.

Yn ôl Fiona mae'r ddau hefyd yn gwneud ymholiadau gyda recordiau byd Guinness gan fod y daith gyfan wedi cael ei gofnodi ar oriawr glyfar y ddau drwy GPS.

"Mae'r cyfan gennym ni wedi'i gofnodi, pob milltir ac mae 'na fap yn dangos yn union lle yr oedden ni'n rhedeg," meddai Fiona.

O'r atgofion, un peth fydd yn aros yng nghof Hugh am y daith fydd gweld yr haul yn gwawrio a machlud wrth redeg. Roedd y ddau yn ceisio rhedeg yn gynnar yn y bore neu'n hwyr yn y nos.

"Mae rhai pobl yn gofyn i ni pa un oedd y state gora ond dyw hwnna ddim yn gwestiwn fair i ddeud y gwir achos rhai o'r states roedden ni'n dreifio drwyddyn nhw am oriau a rhai eraill piciad i mewn, rhedeg a piciad allan yn syth," meddai.

Un o uchafbwyntiau'r trip i Hugh oedd treulio amser yn y Grand Canyon yn Arizona.

"Gafo ni gyfle i aros mewn cabin ar ochr y Grand Canyon a gweld yr haul yn mynd i lawr tra oedden ni'n rhedeg ac roedd hwnna yn ofnadwy o sbeshal.

"Doedd na ddim sŵn ddim byd dim ond y sêr i'w gweld uwch ein pennau," meddai.

Rhagor o redeg?

Nawr fod yr her o goncro taleithiau America wedi'i gwblhau, mae gan y ddau heriau eraill ar y gorwel.

Maen nhw eisiau cwblhau a rhedeg y chwe 'Major Marathons' sydd 'na o gwmpas y byd.

Mae'r rhain yn cynnwys Efrog Newydd, Llundain, Chicago, Berlin, Tokyo a Boston.

"Rydym wedi gneud pedwar o'r rhain yn barod ac rydw i'n ddigon lwcus o fod wedi cael lle yn Tokyo a Boston ar gyfer y flwyddyn nesaf," meddai Fiona.

"Unwaith bydd y rhain wedi'u cwblhau pwy a ŵyr pa her fyddwn ni'n neud nesaf."