³ÉÈË¿ìÊÖ

Mae siopa'n lleol yn "bwysicach nag erioed" eleni, yn ôl ymgyrch i hybu busnesau bach.

Cynhelir Sadwrn y Busnesau Bach ar draws y DU heddiw (5 Rhagfyr) am yr wythfed tro.

Yn ôl y trefnwyr, mae pobl yn cefnogi eu siopau lleol yn fwy nawr nag yn y cyfnod cyn y pandemig.

Ond maen nhw'n annog pobl i barhau i wneud hynny am fisoedd i ddod, o ystyried yr amgylchiadau.

Prin yw'r siopau cadwyn yn nhref Rhuthun, sy'n gartref i sawl busnes bach.

Mae Hana Dyer o gaffi'r Cabin wedi gweld ei busnes hi'n ffynnu yn ystod y cyfnodau clo.

"I ni mae o wedi helpu," meddai.

"Mae pobl yn trio suportio yn lleol - lot o bobl yn dod fewn ac yn aros yn Rhuthun. A dydy pobl leol ddim yn mynd yn bell iawn, so maen nhw'n dal i ddod mewn i'r siop."

Yr ochr arall i'r sgwâr, mae bar gin lle mae Nicky Varkevisser yn rheolwr. Oherwydd y gwaharddiad presennol ar werthu alcohol, mae'r busnes wedi troi at werthu diodydd poeth yn hytrach na choctels.

"Coffi a chacennau yw'r arlwy rŵan - a bar gin sydd ddim yn cael gwerthu gin!" meddai.

"Dwi'n meddwl bod busnesau ar y cyfan yn ei chael hi'n anodd. Sadwrn diwethaf roedd 'na farchnad Nadolig ac roedd y dref yn brysur am unwaith. Ond fel arall mae hi'n farwaidd yma."

Mae ymgyrch Sadwrn y Busnesau Bach yn dweud bod cyfraniadau bach cwsmeriaid unigol i'w siopau lleol yn gallu creu "effaith enfawr" mewn cyfnod anodd.

"Nawr, fwy nag erioed, mae hi'n allweddol inni dynnu sylw at fusnesau bach a'r cyfraniad pwysig maen nhw'n ei wneud i'n gwlad" meddai Michelle Ovens, cyfarwyddwr y fenter.

"Eleni, rydyn ni'n annog pobl i estyn eu cefnogaeth nid yn unig ar Sadwrn y Busnesau Bach ond yn yr wythnosau a'r misoedd nesaf, a thu hwnt, a hynny ymhob ffordd ddiogel bosib."

Mae Neil Darvill o siop anifeiliaid anwes Just4Paws, hefyd ar sgwâr Rhuthun, yn gweld bod mwy o gwsmeriaid yn dod drwy ddrysau'r siop. Ond mae'n pwysleisio bod angen i hynny barhau - a bod heriau eraill yn wynebu'r stryd fawr.

"Yn ystod y cyfnodau clo, fe drodd llawer o bobl at siopa ar y we. Mae angen bod pobl yn dod allan eto ac yn gwario'u harian yma."

I Gwilym Evans, perchennog siop lyfrau a chrefftau Elfair, mae cefnogaeth pobl leol wedi bod yn hollbwysig dros y misoedd diwethaf - ac mae'n credu bod llygedyn o obaith y bydd cwsmeriaid yn fwy hyderus i ddod allan yn y misoedd nesaf.

"Mae sicrwydd wedi dod efo'r brechlyn Covid-19. Mae'n mynd i gymryd amser, ac mae angen gofal, ond 'dan ni yn credu y bydd 'na drefn erbyn yr haf nesaf a bydd tref fel Rhuthun yn gallu parhau i ffynnu."