Hydref, 2005
Mae nyrs o Gymru sy'n benderfynol o gynorthwyo eraill yn rhai o wledydd tlotaf y byd newyddymuno â'r rhai sy'n cynnig cymorth i drueiniaid Kashmir.
Bu i Elin Mererid Jones, 30, o Rosygwaliau ger Y Bala adael ei chartref brin i bythefnos yn ôl wedi iddi dderbyn galwad gan grŵp MSF yn dilyn y daeargryn erchyll sydd wedi lladd 20,000 o bobl ym Mhacistan.
Treuliodd Elin y pythefnos cynt ar gwrs hyfforddi ym Mharis ar gyfer rhai mewn sefyllfaoedd peryglus.
Yn anodd
"Mi oeddwn i newydd orffen y cwrs pan dderbyniais alwad ffôn gan MSF yn gofyn imi fynd i Kashmir ym Mhacistan i helpu goroeswyr y daeargryn," meddai.
"Mae'r dyddiau diwethaf wedi bod yn anodd wrth imi wynebu ffarwelio a ffrindiau a theulu unwaith eto, ceisio pacio, a pharatoi fy hunan yn gorfforol ac yn feddyliol, ond dwi ar y fy ffordd rŵan.
"Wrth gwrs dwi'n bryderus. Mae'n hollol naturiol poeni 'chydig am y daith nesaf ond dwi'n barod i helpu'r bobl sydd yn dioddef gyda chymorth brys," ychwanegodd Elin.
Yn ddifrifol
"Mae'r sefyllfa ym Mhacistan yn ddifrifol, gyda dros 2.5 miliwn wedi colli eu cartrefi, rhan helaeth heb loches ac heb fwyd na dŵr oer i'w yfed. Bydd hyn yn araf arwain at ddiffygion iechyd hefyd.
"Mae nyrs arall a oedd gyda mi yn y Sudan hefyd am hedfan drosodd ac fe fydd y ddwy ohonom gydag eraill yn asesu'r sefyllfa ac yn paratoi'r gofal sydd ei angen ar y bobl.
"Roedd MSF ym Mhacistan cyn y daeargryn ac mae'r gofal wedi dechrau yn syth, yn ogystal â chynllun iechyd y meddwl ar gyfer y rhai sydd wedi dioddef," ychwanegodd.
"Dwi ddim yn gwybod am faint fydd fy angen ym Mhacistan, efallai mis, tri mis neu hanner blwyddyn. Ond gobeithio y gallai fod o help i'r rhai sy'n dioddef," meddai.
 Yn ystod y misoedd diwethaf bu Elin yn cynnal nosweithiau gyda mudiadau a sefydliadau yn ceisio codi ymwybyddiaeth o'r dioddef enbyd sy'n parhau yng ngwledydd y trydydd byd.
Yn 2003 y cychwynnodd ar ei theithiau fel nyrs gan ymweld â Humera yn Ethiopia lle'r oedd yn rhan o brosiect ymhlith dioddefwyr HIV ac AIDS.
Enillodd gymaint o'r profiad fel y bu iddi dderbyn cynnig gan y grŵp MSF i weithio am saith mis ychwanegol yn y Sudan.
Cymorth brys
"Mae Medecins Sans Frontieres yn fudiad annibynnol blaenllaw sydd yn delio gyda chymorth meddygol brys," meddai Elin.
"Maent yn gweithio erbyn hyn mewn 80 o wledydd dros y byd ac yn rhoi cymorth i ddioddefwyr rhyfel, i rai sy'n dioddef pherwydd trychinebau naturiol fel yr un ym Mhacistan ac eraill sydd yn dioddef o afiechydon.
"Mae MSF yn gwneud gwahaniaeth ac mae'n rhoi cymaint o bleser imi fod yn rhan o'r gwaith yma, yn enwedig o weld y bobl yn cryfhau ac yn dechrau gwenu a bwyta unwaith eto," meddai Elin.
|
