Er mai mewn tÅ· cownsil ym Mron-y-Felin Llangefni y ces i fy ngeni, mae 'na 'chydig o anian yr amaethwr yn fy nghyfansoddiad. Ddim llawer mae'n wir, ond digon mae'n amlwg i mi gael pedwar diwrnod wrth fy modd yn y Sioe Frenhinol yn Llanelwedd eto eleni.
Porthmon oedd fy nhaid wrth ei alwedigaeth, ac fe'i ganwyd yn Felin Fadryn ar dir Love Jones Parry ym Mhen Llyn. Pan oeddwn i'n fychan adroddai straeon amdano yn cerdded hwyaid efo col-tar o dan eu traed i farchnad Pwllheli.
Mae gen i go' da iawn o fynd efo fy nhaid yn ystod gwyliau ysgol i'r farchnad yn Llangefni, ac i Bentraeth hefyd i aros ar fferm Yncl Frank ac Anti Stephanie. 'Sdim rhyfedd mod i'n gwybod mae brîd o wartheg ydi Limousin, ac nid car mawr du i gario sêr Holywood i'r Oscars.
Dyma bellach y sioe amaethyddol ora' yn Ewrop meddai'r gwybodusion, ac fe ddaeth dros chwarter miliwn o'r rheini i'r sioe yn ystod yr wythnos. Mae hi'n cynnig rhywbeth i bawb- o bot o fel, i geffyl gwedd, o darw urddasol, i fyrgyr flasus. Fe synais i at frwdfrydedd y ffermwyr ifanc, ac amrywiaeth y cystadlaeuthau ar y llwyfan. Yn ol Nigel Owens, y dyfarnwr rhyngwladol, a Llywydd Clybiau Ffermwyr Ifanc Cymru. roedd safon y rygbi saith- bob- ochor yn uchel iawn.
Llongyfarchiadau i Sir Gaernarfon, noddwyr y sioe eleni, am Å´yl i'w chofio.
Un nodyn trist i gloi. Ar ddechrau'r sioe fe fu farw'r, bardd a'r ysgolhaig Geraint Bowen. Ym mil naw pedwar chwech, ei awdl o i'r Amaethwr, enillodd y gadair yn eisteddfod Aberpennar. Meddai Alan Llwyd : 'Fe'i lluniwyd mewn cyfnod a oedd ar y ffin rhwng amaethu traddodiadol ac amaethu yn y dull newydd. Awdl gywrain ryfeddol' Ac fe fyddai pawb ddaeth i Lanelwedd eleni yn cytuno efo'r gwirionedd yng nghwpled ola' englyn cynta'r awdl honno
'Y gwr a arddo gweryd
A heuo faes-gwyn ei fyd.'
Lluniau o'r Sioe
Llangollen a Llangefni - dyna'r ddau le oedd yn llawn o liw a chyffro yr wythnos dwutha. Am un wythnos bob blwyddyn mae Llangollen fel petae yn deffro o'i thrwmgwsg ac yn gwahodd gwledydd y byd i lwyfan y pafiliwn rhyngwladol.
Ar waetha'r tywydd anwadal fe gafwyd wythnos arall i'w chofio, ac fe groesawyd, corau o Ynysyoedd y Philipiniad, unawdwyr o Awstralia, cantorion o Luisianna a dawnswyr o'r India. Wel, dawnswyr o dras Indiaidd, o leia. Oherwydd pan welais i griw o fechgyn ifanc golygus yn eu gwisgoedd glas, a phob un yn gwisgo turban melyn ac yn chwarae offeryn Indiaidd yr olwg, yn naturiol fe ofynnais i iddyn nhw y cwestiwn amlwg, mewn un gair 'India' ? 'No' oedd yr ateb 'Dudley'. O Langollen i Langefni lle roedd y carnifal yn cael ei gynnal eleni am y tro cyntaf ers deunaw mlynedd.
Nicci a'i ffrindiau sydd wedi atgyfodi'r digwyddiad, ac efallai eich bod chi wedi bod yn dilyn eu hanes nhw ar S4C. Mae'r bennod olaf, sef diwrnod y carnifal, i'w gweld nos Sul nesa' am hanner awr wedi wyth. Ar ol deud rhyw gair bach i agor y carnifal yn swyddogol, fe ges i dipyn o syrpreis, a hwnnw mewn bocs mawr gwyn. 'Roedd y gennod wedi trefnu fy mod i'n cael teisen penblwydd siap set radio i ddathlu'r diwrnod ar y trydydd ar ddeg o Orffenaf.
Felly os 'da chi am anfon rhyw anrheg bach ata i.......
Fe fu na gyfle i mi hel atgofion efo nifer o wynebau o mhlentyndod, a phpb sgwrs yn dechrau efo'r un cwestiwn "Ew 'ti'n cofio ni'n gwisgo i fynny fel cowbois ac Indians ar gyfer carnifal Llangefni flynyddoedd yn ol?"
Llongyfarchiadau i Nicci a'r gennod a diolch yn fawr ar ran y ddwy fil a ddaeth i'r carnifal, am ddiwrnod i'w gofio yn yr haul.
Ydi mae hi'n dipyn o daith, ac yn beryglus iawn - yn enwedig rhwng Tymbl a Pontyberem!
Gadwch i mi esbonio. Dydd Sadwrn 'roeddwn i yn sioe Bancffosfelen,
Ìý
Yna, ar ôl galw heibio Parc y Scarlets, ddoe, lle roedd y ³ÉÈË¿ìÊÖ wedi trefnu diwrnod agored ddydd Sul, i fynny a fi i Langollen er mwyn treulio pedwar diwrnod yn yr Eisteddfod Ryngwladol-lle bydd 'na ddawnswyr o'r India(Bangalore, ella) corau o'r America(yn sicr), cantorion o Canton (hwyrach), a llond maes o liwiau llachar gwisgoedd cenedlaethol y gwahanol wledydd.
Yn rhyfedd iawn, 'tydi'r gefnogaeth Gymreig i'r Ŵyl ddim mor frwdfrydig ag y gallai fod, er fod unigolion a chorau fel Timothy Evans, Glanaethwy a Godre'r Arran wedi dangos eu bod nhw cystal bob tamed a chystadleuwyr unrhyw wlad yn y byd. Yn sicr fe fyddwn ni, ar Radio Cymru yn rhoi sylw i gystadleuwyr Gwlad y Gân, ac fe gewch chi glywed y cystadlu ar raglen Nia yn y bore a Geraint Lloyd yn y p'nawn ar ddydd Mawrth a dydd Mercher.
Erbyn dydd Sadwrn fe fydda i yng ngharnifal Llangefni, ac fel hogyn o'r dre rydw i'n hynod o falch fod y trefnwyr wedi gofyn i mi agor y carnifal, ond fydd dim rhaid i mi wisgo fel Mozart, fel y g'nes i yng ngharnifal Llangefni ym 1949. Ond ydach chi'n nabod yr hogyn bach diniwed arall yn y llun ar y dde?
Ìý
Neb llai na Tony, o'r ddeuawd Tony ac Aloma.
Felly mae 'na obaith y gwela i chi naill ai yn Llangollen neu Langefni yr wythnos hon, neu yn Sioe Fawr Llanelwedd ym mhen pythefnos.
Gyda llaw diolch i Doris a Meinir Teilio am y sgwrs yn sioe Bancffosfelen, Os 'da chi am wybod unrhwy beth o hyn ymlaen am ddefaid Balwen anfonwch at hywel@bbc.co.uk
Hanesion 