Blodau, Bagiau a Hen Lyfr Cownt
Fel pob pregethwr da, 'dwi wedi dewis tri phen i'r bregeth heddiw.
Mae'r blodau'n cyfeirio at gystadleuaeth 'Cymru yn ei Blodau', ac eleni eto
fe enillwyd y gystadleuaeth yn yr adran i bentrefi efo llai na 300 o drigolion
gan bentref Casblaidd, sir Benfro, sydd rhyw saith milltir i'r gogledd o Hwlffordd.
Plant Ysgol Casblaidd, Sir Benfro yn weithgar yn yr ardd
Fe fu plant yr ysgol, dan arweiniad y pennaeth Wendy Raymond yn weithgar iawn hefyd, a'r newyddion da ydi, fod gerddi Casblaidd wedi eu henwebu ar gyfer y wobr gyntaf drwy Ynysoedd Prydain.
Felly ym Mirmingham heno (nos Fercher Medi 29ain) efallai y bydd Geoffrey Eynon, Gwenda Williams, Brynmor Harries a Wendy, yn codi gwydryn o siampên i ddathlu.
Fe gewch wybod ar Radio Cymru fore Iau (Medi 30ain), ar raglen Nia Roberts rhwng hanner awr wedi deg a hanner dydd.
Parch Geoffrey Eynon, Wendy Raymond, Gwenda Williams a Brynmor Harries a fydd yn cynrychioli pentre' Casblaidd yng nghystadleuaeth 'Prydain yn ei Blodau' yn Birmingham
A beth am y bagiau a'r hen lyfr cownt?
Wel 'roedd yn rhaid i mi deithio o Gasblaidd i Bumsaint, ger Llambed am yr ateb. Yn y pentref bychan hwnnw mae 'na ddau fusnes sy'n dyddio'n ôl i'r ddeunawfed ganrif.
Un ydi busnes D. Lloyd a'i feibion, a sefydlwyd ym 1797. Busnes coed a cherrig, a glo - a dyna esbonio'r bagiau.
Tecwyn Lloyd a'i chwaer Ceinwen, sy'n gofalu am y busnes
A'r llall yn fusnes Garnet Rees sefydlwyd fel gefail y gof ym 1756, ond sydd bellach yn fusnes atgyweirio peiriannau.
Garnet Rees (ar y dde), gyda'i fab Arwyn
Ac mae gan Garnett gopi o hen lyfr cownt yn dyddio'n ôl i ddechrau'r bedwaredd ganrif ar bymtheg. Fe fydd hanes y ddau fusnes ar raglen Geraint Lloyd cyn bo hir, ac fel un sy'n hoffi busnesu ym musnes pobol, os wyddoch chi am fusnes sy'n hyn na'r ddau ym Mhumsaint, cysylltwch efo fi ac fe aiff y fan a fi i'r fan a'r lle i gael yr hanes.
Hanesion 