³ÉÈË¿ìÊÖ

Aonghais Iain a ghràidh,

Bha mi cho toilicht’ an litir agad fhaighinn air an t-seachdain sa chaidh agus tha mi an dòchas gu bheil thu a’ dèanamh adhartas anns an ospadal. Gheibh thu beagan fois airson greis an dèidh na tha thu air a dhol troimhe bhon a thòisich an cogadh uabhasach seo agus tha fios gu leig iad dhachaigh thu airson beagan ùine an turas seo an uair a gheibh thu a-mach às an sin. Mas e agus gu faigh thu cead siubhal a Bheinn a’ Bhadhla feuch nach dìochuimhnich thu tadhal orm ann an Glaschu air do rathad dhachaigh.

Tha cùisean air an aon dòigh an seo. Chaidh Aonghas dhachaigh bho chionn trì seachdainean ach cha d’ fhuair e idir a-staigh dhan Infirmary. Dh’obraich e gu cruaidh fhad ’s a bha e ann an Glaschu agus bidh na choisinn e na chuideachadh mòr dha. Chùm mi a phàigheadh air fad dha gus an latha a bha e a’ dol dhachaigh. Bha trì nota deug aige agus bha e roimhe sin air seachd notaichean a chur dhachaigh agus tha còir gun cuidich sin iad gu mòr.

Tha Màiri dìreach mar a chunnaic thu i ach chaidh Dòmhnall a dhroch ghortachadh. Bhris e grunn asnaichean agus bha e ùine mhòr air an leabaidh ach tha e ceart gu leòr a-nis.

Fhuair mi litir bhon taigh aig toiseach na seachdain agus a rèir choltais tha iad uile gu math. Bha iad ag innse dhomh gun do chaochail Ceit Mhunc às a’ Ghearradh Bheag ged nach robh i air a bhith meadhanach ro fhada.

Chan eil cho fada bhon a chunnaic mi Ailig agus bha e air dhà no trì litrichean fhaighinn bho Dhòmhnall, an gille aig Magaidh a phiuthar. Tha truas agam ri Ailig bhon a bha Dòmhnall na chuideachadh mòr dha agus a’ chlann aige fhèin fhathast cho òg. Chan eil Dòmhnall fhèin ach bliadhna air fhichead ach aig aois far an tionndaidheadh e a làmh ri rud sam bith air a’ chroit. ’S ann a’ faighneachd mu obair na croite a bha e agus bidh cuimhne agad cho tric agus a bhitheadh e a-muigh a’ sealg nan gèadh. Bidh iad pailt gu leòr am Beinn a’ Bhadhla air a’ gheamhradh seo agus na sealgairean òga air fad air falbh dhan chogadh. Bha e cuideachd ag innse dhomh gun cuala e bho Ailig òg ann an Canada. Tha e an-dràsta ag obair ann an Calgary agus tha e air dèanamh math dha fhèin anns an dà bhliadhna bhon a chaidh e null ach tha e ag radh gu bheil gnothaichean a-nis a’ dol sìos ri linn a’ chogaidh. Tha mi a’ smaointinn gu bheil Ailig òg a’ faireachdainn cho fad air falbh bho theaghlach agus a’ gabhail uallach mhòr mu chuid caraidean òg a tha air falbh dhan chogadh agus esan sàbhailt dha chosnadh ann an Canada.

Mar a tha sinn uile, tha e an dòchas nach bi fada gus an tig crìoch air an sgrios uabhasach seo. Bha Ailig òg an-còmhnaidh cho coibhneil agus a rèir choltais cha tàinig atharrachadh sam bith ann: chuir e airgead dhachaigh thuca air fad an cois na litreach. Bidh e a’ cluinntinn bho pheathraichean ann an Ameireaga agus tha iadsan cuideachd a’ dèanamh gu math.

Fàgaidh mi aig an sin e an-dràsta agus bidh mi a’ coimhead air adhart ri litir bhuat agus an dòchas nach bi fada gus am faic sinn a chèile.

Do phiuthar,

Ceit.