���˿���

Mae Jamie Roberts yn dweud ei fod yn sefyll yn unfrydol ar ôl beirniadu Warren Gatland yn gyhoeddus yn dilyn colled gyntaf Cymru yn erbyn Fiji yng Nghaerdydd.

Cafodd cyn-ganolwr Cymru a’r Llewod ei ethol yn aelod o fwrdd Undeb Rygbi Cymru'r llynedd tra’n parhau i weithio yn y cyfryngau.

Roedd Roberts yn un o’r lleisiau mwyaf beirniadol wedi’r golled yn erbyn Fiji wrth ddweud yn blwmp ac yn blaen mai dyma oedd y cyfnod gwaethaf i’r tîm cenedlaethol yn ystod yr oes broffesiynol.

“Dwi’n deall y spin mae Warren yn ceisio rhoi. Ond dwi wirioneddol o’r farn nad yw Cymru wedi symud ymlaen o gwbl," meddai.

Fe ymatebodd prif hyfforddwr Cymru i’r sylwadau drwy ddweud nad oedd yn poeni rhyw lawer, a bod gan bawb hawl i’w barn bersonol.

Ond fe ychwanegodd Gatland fod yna sawl person wedi cysylltu â’r cyn-chwaraewr i ddweud nad oedd y sylwadau’n briodol na theg - rhywbeth sydd wedi’i wadu'n llwyr gan Roberts ei hun.

Dywedodd Jamie Roberts: “Dwi’n aelod o fwrdd Undeb Rygbi Cymru ond dwi hefyd ar adegau yn cael fy nghyflogi gan y cyfryngau ac mae disgwyl i mi roi barn onest.

"Mi wnes i roi barn o’r hyn weles i ar y penwythnos a sut oeddwn yn gweld y tîm yn yr oes broffesiynol ac yn anffodus mae’r ffeithiau yn glir, does dim gwelliant wedi bod 'na chynnydd o ran tîm Cymru ac mae hynny, mae gen i ofn, yn ffeithiol gywir."

Aeth y cyn-ganolwr ymlaen i ddweud nad oedd hyn yn bersonol o gwbl tuag at y prif hyfforddwr presennol.

“Dyw hi byth yn bersonol a dwi’n edmygu Warren Gatland yn fawr ac mae gen i barch mawr tuag ato, ond yr hyn dwi ddim yn barod i wneud yw ymddiheuro am sylwadau dwi 'di wneud sydd, dwi’n credu, yn onest ac yn rhan o’r hyn sy’n ddisgwyliedig wrth geisio dadansoddi."

Fe enillodd Jamie Roberts 94 o gapiau dros Gymru, ac roedd yn rhan allweddol o garfan y Llewod o dan hyfforddiant Gatland yn 2009 a 2013.

Roedd yn rhan ganolog o ddull chwarae Gatland - yn un fyddai â’r cryfder corfforol i sicrhau byddai Cymru ar y droed flaen ac yn croesi’r llinell fantais.

Er ei fod yn barod i feirniadu, mae dal yn barod i ganmol rôl y gŵr o Seland Newydd yn llwyddiant y tîm cenedlaethol.

“Does gen i ond y parch mwyaf at Warren Gatland, mae e wedi bod yn hyfforddwr gwych dros y blynyddoedd.

"Mae 'na bwysau o hyd ac mi fydd e yn fwy na neb yn gobeithio am fuddugoliaeth yn druenus.

"Mae hi wedi bod yn gyfnod o drawsnewid o ran y gêm yng Nghymru a dwi’n derbyn hynny, mae 'na sawl chwaraewr ifanc yn gorfod bwrw’i swildod ar lefel rhanbarthol yn gynt na’r disgwyl.

"Dyw hi ddim yn rhwydd ac mae’n heriol, ond mae rhaid i Warren gyfaddef mai ei ben sydd ar y bloc o ran canlyniadau’r tîm cenedlaethol - a dyw’r rheiny yn syml ddim wedi gwella.”

Er gwaetha' colli am y 10fed tro yn olynol a dod yn gyfartal â’r record waethaf erioed yn hanes rygbi Cymru, mae’r cyn-chwaraewr yn ffyddiog gall y tîm daro'n ôl, ac yn grediniol gall Gymru brofi buddugoliaeth yn erbyn y Wallabies.

“Dwi’n deall mai Awstralia fydd y ffefrynnau ar ôl curo Lloegr ond dwi wir yn meddwl fod yna gyfle gwych i newid y sefyllfa yn llwyr.

"Yn seicolegol mi fydd yn anodd i Awstralia i greu perfformiad tebyg i’r un welon ni yn Twickenham, ar ôl cyrraedd yr uchelfannau yn emosiynol dim ond un lle sydd i fynd a dwi’n siŵr fydd Warren wedi crybwyll hynny yn ystod yr wythnos.

"Does dim dwywaith mae Cymru yn gallu ennill - bosib bod sawl un yn meddwl mod i’n hurt yn dweud hynny ond yn draddodiadol mae Cymru yn perfformio’n dda yn erbyn y Wallabies.

"Mae 'na sawl gêm dros y 15 mlynedd ddiwethaf wedi bod o fewn sgôr, rhywffordd mae’n rhaid i Warren a’r garfan feddwl hynny ac o bosib fydd ennill yr un gêm yna yn gwneud byd o wahaniaeth."