Dyn yn cyfaddef lladd mam yn Llanelli, ond yn gwadu llofruddio

Dyn yn cyfaddef lladd mam, 30, yn Llanelli

23 Hydref 2024

Mae dyn o Borth Tywyn wedi cyfaddef dynladdiad mam i ddau o blant yn Llanelli, ond wedi gwadu ei llofruddio.

Fe wnaeth Richard Jones, 50, ymddangos yn Llys y Goron Abertawe ddydd Mercher trwy gyswllt fideo.

Plediodd yn ddieuog i lofruddiaeth Sophie Evans, ond yn euog i'w dynladdiad.

Cafwyd hyd i gorff Ms Evans, 30, mewn tŷ ar Ffordd Bigyn yn Llanelli ar 5 Gorffennaf eleni.

Cafodd Jones ei gadw yn y ddalfa, ac mae disgwyl i'r achos llofruddiaeth yn ei erbyn ddechrau ar 20 Ionawr.

Cafodd Sophie Evans ei chanfod mewn tŷ ar Ffordd Bigyn yn Llanelli ar 5 Gorffennaf

Wrth roi teyrnged iddi dywedodd teulu Ms Evans: "Ry'n wedi torri'n calonnau wedi'n colled. Fe fydd yn cael ei cholli gennym i gyd.

"Mae'n merch a chwaer brydferth a rhyfeddol wedi'i chymryd oddi wrthym a bydd ein bywydau fyth yr un fath eto.

"Roedd hi'n fam gariadus i ddwy o ferched - rhai roedd hi'n eu caru â'i holl galon. Roedd hi'n chwaer ryfeddol a oedd yn graig i'n teulu.

"Roedd hi'n ddisglair ac yn ddoniol a wastad yn gwneud i ni chwerthin."