³ÉÈË¿ìÊÖ

Mae person ifanc oedd yn rhan ganolog o'r honiadau gwreiddiol yn erbyn Huw Edwards wedi honni fod y darlledwr wedi cymryd mantais ohono.

Mewn cyfweliad gyda phapur newydd y Daily Mirror, dywedodd y dyn bod y cyn-gyflwynydd newyddion yn gwybod nad oedd ganddo lawer o arian.

Mae'r dyn yn honni bod Edwards wedi talu iddo anfon lluniau o natur rywiol ato tra'r oedd yn ei arddegau.

Y llynedd dywedodd Heddlu'r Met yn Llundain nad oedd tystiolaeth fod Edwards wedi cyflawni trosedd.

Mewn achos ar wahân yr wythnos ddiwethaf, plediodd Huw Edwards yn euog i greu lluniau anweddus o blant.

Ym mis Gorffennaf 2023, fe gyhoeddodd papur newydd The Sun stori am ddyn ifanc oedd yn honni bod Huw Edwards wedi ei dalu am luniau o natur rywiol.

Roedd yr erthygl yn cynnwys honiadau gan ei fam oedd yn honni bod Edwards wedi talu degau ar filoedd o bunnau dros gyfnod o dros dair blynedd, a bod hynny wedi dechrau pan oedd ei mab yn 17 oed.

Ond ychydig ddyddiau'n ddiweddarach, fe ddywedodd cyfreithiwr ar ran y dyn ifanc bod yr honiadau yn y papur newydd yn "rwtsh".

Mewn llythyr i'r ³ÉÈË¿ìÊÖ, dywedodd y cyfreithiwr nad oedd unrhyw beth amhriodol na anghyfreithlon wedi digwydd.

Ond mewn cyfweliad newydd sydd wedi ei gyhoeddi yn y Daily Mirror, mae'r dyn ifanc yn dweud ei fod wedi "teimlo ei fod yn gallu ymddiried" yn Huw Edwards ond ei fod wedi "rhyw fath o fwydo oddi ar ba mor fregus oeddwn i".

Mae'n dweud ei fod wedi cysylltu gydag Edwards, a nifer o bobl enwog eraill, ar y cyfryngau cymdeithasol er mwyn gofyn am gymorth tra'r oedd yn ddigartref.

'Roedd e'n gwybod fy mod i angen arian'

Dywedodd bod y cyn-gyflwynydd 62 oed wedi anfon arian ato, cyn dechrau gofyn a oedd unrhyw beth y gallai ef ei wneud yn gyfnewid am yr arian.

"Er mai cyfeillgarwch oedd hyn ar y dechrau, fe wnaeth hynny newid.

"Byddai'n dweud pethau fel, 'Wyt ti am wneud rhywbeth i mi felly?' Roeddwn i angen help, felly fe wnes i," dywedodd.

"Roedd e'n gwybod fy mod i angen arian."

Mae'r dyn ifanc yn dweud ei fod wedi anfon negeseuon a fideos o natur rywiol at Edwards ac mae 'na adroddiadau ei fod wedi anfon £35,000 ato yn gyfnewid am y lluniau dros gyfnod o ddwy flynedd.

"Gan ei fod yn gyflwynydd y ³ÉÈË¿ìÊÖ a gan fod ganddo gymaint o bŵer... roeddwn i'n teimlo fel y gallwn i ymddiried ynddo a'i fod yn meddwl am fy lles i," dywedodd y dyn ifanc.

"Roeddwn i'n parchu'r dyn yma ond doedd e wir ddim yn poeni amdana i.

"Roeddwn i'n teimlo ei fod yn cymryd mantais ohona i ond roeddwn i'n teimlo bod yn rhaid i mi wrando arno gan mai Huw Edwards oedd e."

Dywedodd ei fod wedi "aros yn dawel" er mwyn gwarchod Edwards, ond ychwanegodd ei fod yn "teimlo'n sâl" pan glywodd y newyddion yr wythnos yma.

Yn y cyfamser, mae'r Sun wedi cyhoeddi fideo o Edwards - maen nhw'n ei honni - sy'n ei ddangos yn aros am y dyn ifanc mewn gorsaf drenau yng Nghymru.

Y gred yw mai llys-dad y dyn ifanc wnaeth ffilmio'r lluniau.

Dywedodd y llys-dad wrth y papur newydd: "Roeddwn i mor grac. Roeddwn i eisiau mynd draw ato a dweud wrtho i stopio wneud yr hyn roedd e'n ei wneud."

Cafodd Edwards ei wahardd o'r ³ÉÈË¿ìÊÖ fis Gorffennaf y llynedd ar ôl i'w wraig gyhoeddi mai ef oedd y cyflwynydd oedd yn ganolog i'r honiadau.

Mae'r dyn ifanc yn honni bod Edwards wedi anfon neges destun ato oddi ar rif ffôn anhysbys fis Hydref y llynedd.

"Dwi'n credu bod hynny rhyw bythefnos cyn iddo gael ei arestio. Roedd y neges yn dweud 'dyfala pwy sydd yma?' neu rywbeth felly," dywedodd.

"Roedd y neges yn dweud 'paid dweud fy enw i fan hyn... ffonia fi'. Felly fe wnes i ei ffonio ac fe ddywedodd wrtha i i ddefnyddio'r app Signal. Ac fe ddywedodd y gallen ni siarad ar hwnna.

"Fe ddywedodd 'Beth sydd wedi bod yn digwydd? Rydw i'n poeni amdanat ti'."

Dydi Edwards heb ymateb i'r honiadau.

Fe ymddiswyddodd o'r ³ÉÈË¿ìÊÖ ym mis Ebrill "ar sail cyngor meddygol".

Ddydd Mercher, fe blediodd yn euog i dri chyhuddiad yn ymwneud â 41 o luniau a chlipiau fideo oedd wedi eu hanfon ato ar WhatsApp.

Roedd saith delwedd yng nghategori A - y categori mwyaf difrifol - a dau o'r rhain yn cynnwys plentyn rhwng tua saith a naw oed.

Fe wnaeth Edwards, 62, ymddangos yn Llys Ynadon Westminster, ar ôl cael ei arestio ym mis Tachwedd.

Bydd yn ymddangos o flaen llys eto ar 16 Medi.