³ÉÈË¿ìÊÖ

Mae cynghorwyr yng Ngwynedd wedi cymeradwyo cais i ymestyn gwaith chwarel yn Ffestiniog tan 2048, gan ddiogelu 34 o swyddi.

Y gred yw mai chwarel Cwt y Bugail, a oedd yn arfer cael ei adnabod fel Chwarel Graig Ddu, Bwlch y Slaters neu Chwarel Manod, ydy safle diwydiannol uchaf Prydain.

Cafodd gwaith o'r Oriel Gelf Genedlaethol ei gadw mewn siambrau ar y safle i'w diogelu rhag bomio yn ystod yr Ail Ryfel Byd.

Dydd Llun fe wnaeth aelodau pwyllgor cynllunio Cyngor Gwynedd gymeradwyo cais i ymestyn y gwaith ar y chwarel am 24 o flynyddoedd.

Ymhlith amodau’r caniatâd oedd uchafswm allforio o 15,000 tunnell y flwyddyn, cyfyngiadau ar yr oriau ffrwydro, a bod yn rhaid adfer y safle pan ddaw’r cymeradwyaeth i ben.

Bydd y cam yn diogelu swyddi, medd perchennog y safle Welsh Slate.

Dywedodd Shaun Denny, o gwmni Breedon Trading sy’n berchen ar Welsh Slate: “Bydd ymestyn bywyd y chwarel yn darparu sylfaen gadarn i'r cwmni fedru gwneud penderfyniadau ynghylch gwariannau pellach er mwyn lleihau gwastraff, cynyddu nifer y llechi ry’n ni’n eu cynhyrchu, a chynyddu nifer y llechi ry’n ni’n gallu eu gwerthu bob blwyddyn – gan fod galw uchel ar hyn o bryd.

“Bydd 34 o swyddi crefftus yn y chwarel hefyd yn cael eu diogelu."

Mae modd adnabod llechi Cwt y Bugail drwy eu lliw llwydlas tywyll sydd ag ambell wythïen wen.

Cafodd y safle ei agor yn 1840.