³ÉÈË¿ìÊÖ

Mae nifer y bobl sy'n dysgu Cymraeg wedi cynyddu o 11% o'i gymharu â'r flwyddyn flaenorol, yn ôl ffigyrau diweddaraf.

Mae'r ffigyrau'r Ganolfan Dysgu Cymraeg Cenedlaethol yn dangos bod mwy na 16,900 o bobl wedi dechrau dysgu yn 2022-23.

Roedd 44% o'r dysgu yma ar gyrsiau ar-lein, ac mae'r cyfanswm draean yn uwch na phum mlynedd yn ôl.

Dywedodd prif weithredwr y ganolfan bod y ffigyrau diweddaraf yn dangos y "bwrlwm" sydd o fewn y sector.

Mae nifer y dysgwyr wedi cynyddu bob blwyddyn ers 2017, pan gychwynnodd y Ganolfan Dysgu Cymraeg Cenedlaethol rhyddhau .

Mae’r ganolfan yn ystyried 2019-2020 yn eithriad (17,505 o ddysgwyr unigryw) oherwydd cynnydd yn niferoedd y dysgwyr a ddilynodd gyrsiau hunan-astudio ar lefel blasu ar gychwyn y pandemig.

Daw'r ffigyrau diweddaraf bron i dair blynedd ar ôl i'r Cyfrifiad ddatgelu bod nifer y siaradwyr Cymraeg wedi gostwng.

Mae'r data'n dangos fod y mwyafrif o ddysgwyr o fewn oed gweithio, ond bod fwy o bobl ifanc wedi dysgu'r iaith na blynyddoedd cynt.

Roedd cynnydd o 9% yn nifer y bobl rhwng 16-24 oed a ddechreuodd ddysgu Cymraeg yn 2022-23.

Cafodd ffigyrau ynglŷn â nifer y dysgwyr o gefndiroedd ethnig lleiafrifol eu rhyddhau am y tro cyntaf eleni.

Mae'r data'n awgrymu bod 3.9% o ddysgwyr yn dod o gefndir ethnig lleiafrifol.

Dywedodd prif weithredwr y ganolfan, Dona Lewis, ei fod yn "sicr yn glod i lwyddiant y sector bod cymaint o bobl eisiau dysgu Cymraeg".

"I ni, mae o'n dangos bwrlwm be' da ni'n weld o ddydd i ddydd.

"Un o heriau mawr y sector ydi ymateb i'r galw uchel sydd yna gan bobl i fod eisiau dysgu Cymraeg.

"Mae yna alw uchel am ddysgu Cymraeg, mae yna awydd uchel."

Credai Ms Lewis fod y ffurf wahanol mae gwersi yn cael ei gynnig yn rhannol gyfrifol am y cynnydd.

"Mae gennym ni lot mwy o ddewis i bobl ddysgu Cymraeg i ffitio mewn efo'i bywydau prysur."

Ychwanegodd: "Mae'r ganolfan yn ceisio sicrhau bod 'na groeso i bawb i ymuno gyda'n cyrsiau ni."

Er bod cyrsiau'r ganolfan wedi profi'n boblogaidd, mae un adnodd adnabyddus wedi wynebu rhwystr.

Cyhoeddodd Duolingo ar ddiwedd 2023 eu bod nhw am roi'r gorau i ddiweddaru cwrs dysgu Cymraeg.

Dywedodd Ms Lewis: "Mae adnoddau fel Duolingo yn rhywbeth sydd ar gael i ategu beth mae [dysgwyr] yn 'neud 'efo ni.

"Mae yna ystod eang o adnoddau eraill allan yna i helpu pobl ar eu siwrne.

"Y mwyaf o bethau sydd ar gael i ddysgwyr, gorau oll."