���˿���

“Dwi’n credu bod ein bywydau ni yn orbrysur. Mae 'na bwysau dychrynllyd ar iechyd meddwl pobl oherwydd hynna. A 'dan ni mewn gwirionedd ddim yn ildio i hynna drwy gynnig gwasanaeth 15 munud, 'dan ni’n herio hynna drwy drio gwneud yn siŵr bod drws yr eglwys yn agored i bobl yng nghanol prysurdeb y byd cyfoes.”

Fel ymateb i brysurdeb pobl yn ei blwyf mae’r offeiriad John Gillibrand wedi cychwyn cynnig gwasanaeth ‘sydyn’ 15 munud ar brynhawn dydd Llun.

Mae’r gwasanaeth, sy’n digwydd yn eglwys Dewi Sant ym Mhenllergaer ger Abertawe, yn digwydd am 4:45 y prynhawn er mwyn denu pobl sy’n gorffen gwaith.

Meddai Mr Gillibrand: “Dwi’n ymwybodol bod cynifer o bobl yn y plwyf ac yn y gymdeithas gyfoes sy’ dan bwysedd gyda phethau gwaith a teuluol ac eisiau rhoi cyfle i bobl ddod i’r eglwys am 15 munud a chael cymorth sylweddol, blasu tangnefedd er mwyn copeio gyda'r pwysedd hyn.

“Dwi ddim yn siŵr o le mae’r syniad wedi dod.

“Ond dwi’n credu bod 'na fyd o les i bobl dan bwysau yn y sefyllfa gyfoes - mae 'na fyd o gyfoeth mewn bywyd ysbrydol a gan amlaf mae eglwysi yn ymddangos fel llefydd codi pres a phoeni am y to ac ati felly 'dan ni’n arwain gyda’r cynnig mwya’ sy’ gyda ni, sef bywyd ysbrydol.

“Yn hytrach na phoeni pobl am bethau eraill fel y pres a’r adeilad 'dan ni’n arwain efo’r hyn sy’n wirioneddol bwysig – o dragwyddol bwys.”

Mae Mr Gillibrand yn dweud fod ymateb y gynulleidfa wedi bod yn gadarnhaol iawn ac yn pwysleisio fod 'na groeso diamod – nid i aelodau’r eglwys yn unig ond i bawb.

Mae wedi dewis yr amser 4.45 er mwyn ffitio mewn gyda diwedd y shifft cyntaf i weithwyr yr Asiantaeth Trwyddedu Gyrwyr a Cherbydau ac Ysbyty Treforus, meddai:

“Cawsom ni dros 20 yn y cwrdd cynta’ gyda phobl yn dod i’r eglwys o’r newydd. Ac hefyd mae’n amlwg bod 'na rai sy’ wedi bod yn bwriadu dod yn gyson.

“Pobl yn dod ar y ffordd o gwaith, pobl oedd wedi gweld y cyhoeddusrwydd yn The Telegraph a The Guardian ac wedi dod o ran diddordeb i weld sut oedd pethau’n mynd.

“Mi oedd pobl o’r Iseldiroedd a’r Philippines yn aros yn yr ardal yn dod ac mi oedd y grŵp yna gyda profiad o arwain yn eu heglwysi eu hunain a gyda diddordeb o weld sut oedd y syniad yn gweithio.”

Mae eglwysi eraill wedi cysylltu gyda diddordeb mewn cychwyn gwasanaethau sydyn yn eu hardaloedd nhw hefyd.

Ac mae’r adborth gan y gynulleidfa wedi bod yn dda iawn, yn ôl John: “Pob dim yn bositif – ac hefyd mae cefnogaeth wedi bod yn fwy gan y gynulleidfa gyson. Yn realistig mewn eglwysi dyw pobl ddim yn croesawu syniadau newydd ond mae pobl Dewi Sant wedi bod fel arall, yn barod i groesawu rhywbeth newydd, barod i arbrofi ac oedd hynny’n dod mas yn eglur yn y pwyllgor eglwys cyn i ni sefydlu hyn i gyd.”

Felly beth mae’n dweud am gymdeithas fod angen gwasanaethau byr ar bobl?

Meddai Mr Gillibrand: “Mi oedd 'na un sylw gan rywun 'mod i’n rhoi i mewn i ffordd yr oes ond dydw i ddim yn cytuno gyda hynny – 'dan ni’n gwneud hyn er mwyn herio a helpu unigolion yng nghanol hyn i gyd.

“Rydyn ni’n addasu er mwyn herio.

“Mae’n gwneud byd o les i finnau hefyd.

“Un o’r pethau sy’ wedi bod yn drawiadol, yw mod i wedi teimlo, oherwydd bod chi’n gorfod canolbwyntio am y chwarter awr mae’n syndod faint o sylwedd sydd i’r gwasanaeth. 'Dan ni gyd yn gweddïo gyda’n gilydd yn ddistaw ac mae’r distawrwydd wedi bod yn ddwfn ac yn llesol."

“Dwi’n ei rannu’n dair rhan sef pum munud sy’n cynnwys gair o groeso ac egluro i bobl fod y croeso yn ddiamod a darlleniad Beiblaidd sy’n gosod thema y gwasanaeth.

“Wedyn meicro-bregeth pum munud yn pwysleisio ffordd mae bywyd ysbrydol Cristnogol yn medru helpu ni yng nghanol prysurdeb y byd. Wedyn pum munud yn y diwedd o weddïo a ddefnyddio distawrwydd jest i fod yn yr eglwys yn llonydd gyda’n gilydd.

“Dwi’n offeiriad eitha’ profiadol sy’ wedi bod wrthi ers 36 o flynyddoedd ac felly dwi’n gwybod pan fydd ymateb dwfn fel yna ac maen sicr wedi dod i hyn.

“Dwi’n credu ei fod hi’n bwysig i eglwysi arbrofi ac ymestyn allan a dangos eu bod nhw’n gwasanaethu y gymuned lleol.

“Os ydy pobl yn troi lan i’r gwasanaeth 15 munud a gwneud hynny’n hapus a chyson, mae’n ffordd arall o fod yn eglwys.

“Yr eglwysi sy’n mynd i dyfu yw’r eglwysi lle mae pobl yn gweld y ffydd yn gwneud gwahaniaeth. Ac hefyd eglwys sy’n ymddiddori mewn pethau sy’n bwysig i bobl – ein bod ni’n dangos y cysylltiad rhwng ffydd a bywyd cyfoes.

"Mae’n syndod beth allwch chi gyflawni mewn 15 munud.”