³ÉÈË¿ìÊÖ

Mae nofwyr yn Ninbych-y-pysgod wedi cael eu rhybuddio y gallen nhw fod yn nofio mewn dŵr brwnt.

Mae ymchwiliad wedi cychwyn i ddigwyddiad yn ymwneud â llygredd yn y môr yn Sir Benfro, meddai Cyfoeth Naturiol Cymru.

Dywedodd CNC bod prif bibell wedi byrstio – pibell sy'n tynnu carthion i'r system garthffosiaeth gyhoeddus - gan arwain at garthion yn mynd i mewn i Afon Ritec, sy’n llifo i’r môr ar Draeth y De Dinbych-y-pysgod.

Dywedon nhw fod yna risg posib o lygredd ar y traeth hwnnw, Traeth y Castell a Thraeth y Gogledd yn Ninbych-y-pysgod yn ogystal â thraeth cyfagos Penalun.

Dywedodd Dŵr Cymru bod y bibell wedi cael ei thrwsio erbyn nos Fawrth.

Un oedd wedi ei siomi gyda'r sefyllfa oedd Chase Blont, 18 o Gwmbrân.

Dywedodd: "Ni wedi bod yma ers bore 'ma, oedd 'da ni paddle boards a phopeth allan.

"Wedyn daeth yr RNLI allan gyda baneri coch a dweud am y llygredd."

Aeth ymlaen i ddweud mai ond am wythnos y maen nhw yn Ninbych-y-pysgod "a dyma un o’r diwrnodau oedd yn edrych yn dda so ni’n eithaf crac.

"Mae’n drist gweld llawer o bobl yn methu mynd mewn i’r môr."

Dywedodd Chase ei bod yn "bwysig bod cwmnïau yn cymryd cyfrifoldeb am y digwyddiad."

Un arall oedd ar y traeth oedd Ellis Harries, 18 o Bont-y-pŵl.

Dywedodd ei fod yn "eithaf siomedig".

"Dwi wastad yn clywed am hyn ar y newyddion, nawr fi’n deall y broblem.

"Gwnaethom ni weld yr arwyddion, i fod yn onest mae’n eithaf gwael bod dim ond arwyddion ar y traeth achos ni wedi teithio’n bell."

Dywed Andrea Winterton o CNC: "Mae Dŵr Cymru wedi rhoi gwybod i ni am bibell ymgodol sydd wedi byrstio ger Dinbych-y-pysgod sydd wedi arwain at garthffosiaeth yn mynd i mewn i Afon Rhydeg.

"Mae’r bibell ymgodol wedi’i hynysu felly ni ddylai fod unrhyw lygredd pellach i’r afon o’r bibell.

"Oherwydd y potensial i’r llygredd effeithio ar y dyfroedd ymdrochi i lawr yr afon, rydym wedi datgan sefyllfa annormal ac wedi hysbysu Cyngor Sir Penfro a fydd yn gosod arwyddion ar y traethau i rybuddio pobl o’r risg llygredd posib."

Dywedodd Dŵr Cymru ddydd Mawrth bod criwiau'n "atgyweirio pibell sydd wedi ei difrodi ger Heol Clickett, Dinbych-y-pysgod, wedi i ni ddarganfod ei bod wedi byrstio ddoe.

Yn ôl llefarydd roedd y gwaith atgyweirio hwnnw "yn heriol" a bod y criwiau yn rhoi ymdrech fawr i sicrhau bod y gwaith yn cael ei wneud yn saff.

"Er bod y gwaith yn cymryd yn hirach na'r disgwyl, fe gafodd y bibell ei hadnabod yn fuan ddoe felly does dim mwy o lygredd wedi gollwng tra bod y gwaith atgyweirio yn digwydd."

Fe ychwanegon nhw eu bod yn "rheoli llif yr ardal ac nid oes effaith ar ddefnydd gwastraff dŵr yn ardal Dinbych-y-pysgod".

Mewn datganiad pellach nos Fawrth fe ddywedodd y cwmni bod y gwaith atgyweirio "wedi ei gwblhau yn llwyddiannus" a'u bod yn diolch pobl leol "am eu hamynedd".