³ÉÈË¿ìÊÖ

Mae dyn wnaeth gicio a dyrnu dyn arall y tu allan i dafarn ym Mhorthcawl yn ystod ffrae am £50 wedi cael ei ddedfrydu i 14 mlynedd o garchar am ddynladdiad.

Bydd yn rhaid i Steven Chappell, 29 oed o Gwmdâr yn Rhondda Cynon Taf, dreulio dau draean o'r cyfnod hwnnw dan glo cyn bod modd ystyried parôl.

Bu farw Daniel Bradley, 32, o sepsis yn yr ysbyty ar 23 Medi y llynedd - bythefnos wedi'r ymosodiad y tu allan i dafarn y Brogden.

Yn ogystal â'r ddedfryd o 14 mlynedd o garchar, bydd Chappel hefyd ar drwydded am ddwy flynedd wedi iddo gael ei ryddhau.

Clywodd Llys y Goron Caerdydd yn ystod yr achos fod yr ymosodiad wedi digwydd wrth i Mr Bradley adael tafarn y Brogden ym Mhorthcawl yn oriau man 9 Medi y llynedd.

Roedd Chappell wedi dweud wrth yr heddlu bod y ffrae yn ymwneud ag arian i brynu cyffuriau, a'i fod o wedi rhoi benthyg £50 i Mr Bradley er mwyn iddo brynu cocên.

Dywedodd Bradley fod Chappell wedi camddeall y sefyllfa ac nad oedd ganddo'r arian.

Cafodd y digwyddiad ei recordio ar gamerâu cylch cyfyng, ac mae'r lluniau'n dangos Chappell - oedd ar faglau ar y pryd - yn cicio a dyrnu Mr Bradley sawl tro mewn dau ymosodiad ar wahân.

Roedd yr ymosodiad cyntaf y tu allan i'r dafarn, a'r ail ar Nicholls Avenue.

Clywodd y llys fod person oedd yno ar y pryd wedi clywed Chappell yn dweud "ti'n lwcus fy mod i ar faglau, achos fyswn i'n dy ladd di".

Cafodd Mr Bradley ei glywed yn gwadu bod arno fo'r arian i Chappell.

Fe aeth mam Mr Bradley i'w weld yn ei gartref deuddydd wedi'r ymosodiad. Roedd ei drwyn yn gwaedu, ei frest a'i ochr wedi cleisio ac roedd yn gorwedd yn y gwely gyda bagiau o rew o'i gwmpas.

Cafodd ei gludo i'r adran frys yn Ysbyty Tywysoges Cymru ym Mhen-y-bont ar Ogwr, ac wedi archwiliadau meddygol daeth i'r amlwg ei fod wedi torri asen.

Cafodd Mr Bradley ei ryddhau o'r ysbyty, ond yn y dyddiau wedi hynny roedd yn teimlo'n rhy wael i dreulio amser gyda'i blant, a doedd ddim yn gallu codi o'i wely.

O ganlyniad, cafodd ei gludo i'r ysbyty unwaith eto ar 15 Medi, lle cafodd ataliad ar y galon a chafodd diagnosis o sepsis difrifol.

Dywedodd ei fam, Barbara Rees: "Doedd gen i ddim syniad pa mor wael oedd e tan fod y doctor wedi dweud eu bod wedi rhoi cymorth cyntaf iddo am 20-30 munud.

"Fe wnaethon nhw lwyddo i'w adfywio, ond fe esboniodd y doctor ei fod yn wael iawn ac y gallen ni ei golli," meddai.

Roedd Mr Bradley wedi dioddef anaf difrifol i'w ben gafodd ei achosi gan ddiffyg ocsigen i'r ymennydd, a bu farw yn yr uned gofal dwys ar 23 Medi.

Dywedodd y barnwr yn yr achos, Tracey Lloyd-Clarke fod yr ymosodiad yn un "ffiaidd" wnaeth achosi "galar a phoen ofnadwy".

Fe wnaeth hi ddweud wrth Chappel ei fod yn ddyn gyda hanes hir o drais ac nad oedd wir yn edifar am yr hyn a ddigwyddodd.

Ychwanegodd ei bod yn cydymdeimlo gyda theulu Mr Bradley, a'i bod hi'n deall na fyddai'r ddedfryd yn tawelu'r galar a'r boen y maen nhw'n ei deimlo.

Dywedodd Heddlu De Cymru mewn datganiad: "Mae'r achos yma yn dangos y sgil effeithiau ofnadwy y mae'r fath yma o ymosodiadau yn gallu ei gael.

"Byddwn yn annog eraill i feddwl am sut y gallai'r fath benderfyniad effeithio ar weddill eich bywyd, ac o bosib, dod â bywyd rhywun arall i ben."