³ÉÈË¿ìÊÖ

Mae'r Swyddfa Gartref wedi dweud mai "teuluoedd", yn hytrach na cheiswyr lloches sengl maen nhw eisiau eu cartrefu yng Ngwesty Parc y Strade yn Llanelli - wrth siarad gyda phobl leol am y cynlluniau am y tro cyntaf.

Fe wnaeth tua 300 o bobl gymryd rhan mewn sesiwn holi-ac-ateb nos Fawrth - sesiwn a gafodd ei chynnal gan Bartneriaeth Ymfudo Strategol Cymru. Roedd y sesiwn yn gyfle i glywed mwy am y cynlluniau i gartrefu ceiswyr lloches mewn gwesty yn Sir Gaerfyrddin

Bydd Gwesty Parc y Strade, Llanelli yn gartref i hyd at 241 o geiswyr lloches dros gyfnod o amser, ond does dim un yn bresennol ar y safle ar hyn o bryd.

Fe gafodd y sesiwn ar-lein ei chadeirio gan y Canon Aled Edwards, cyn Brif Weithredwr Cytûn Eglwysi Ynghyd yng Nghymru, a groesawodd y rhanddeiliaid allweddol.

Dyma'r tro cyntaf i'r cyhoedd glywed gan y Swyddfa Gartref a'u darparwr llety Clearsprings Ready ³ÉÈË¿ìÊÖs mewn cyfarfod o'r fath.

Wrth siarad ar ran y cwmni dywedodd Steve Lakey: "Mae Clearsprings Ready ³ÉÈË¿ìÊÖs wedi bod yn gweithredu ers 23 mlynedd ac wedi bod yn llwyddiannus iawn yn rhoi llety i bobl mewn cymunedau.

"Fodd bynnag, rydym wedi wynebu'r heriau diweddar gan orfod sefyll i fyny ar safleoedd fel hwn a gwestai mewn ffordd debyg iawn.

"Er ei fod yn heriol rydym yn cydnabod bod effaith sylweddol ar y gymuned ac rydym yn gweithio'n galed iawn i ddatrys y materion hynny lle gallwn ni."

Ychwanegodd: "Ein bwriad ar gyfer y gwesty hwn yw rhoi llety fwy neu lai'n gyfan gwbl i deuluoedd.

"Ni fydd unrhyw un sengl yn cael ei letya yno ac fel sydd wedi cael ei grybwyll bydd hyd at 241 o bobl yn derbyn llety, ond fe fyddan nhw'n cyrraedd fesul cam dros gyfnod o amser."

Dywedodd Tim Rymer o'r Swyddfa Gartref: "Rwy'n cydnabod bod defnyddio'r gwesty hwn, unrhyw westy, ymhell iawn o fod yn ddelfrydol.

"Ond ar hyn o bryd mae'n parhau i fod yn anghenraid gweithredol, o ystyried bod angen i ni fodloni ein rhwymedigaeth statudol sy'n parhau i roi gwestai ar waith.

"Gallaf ddweud wrthych yn sicr nawr nad ydym ar fin dechrau symud pobl i fewn - byddwn yn gwneud y gwaith pellach sydd ei angen yn gyntaf, ac yna'n gweithio drwy unrhyw gynlluniau gyda phartneriaid cyn i ni ddod â phobl i'r safle."

Wrth siarad ar Dros Frecwast ³ÉÈË¿ìÊÖ Radio Cymru, dywedodd Aelod Seneddol Llanelli, Nia Griffith, fod "prinder o wybodaeth yn dal i fod" ond ei bod yn croesawu'r eglurder ar y bwriad i gartrefu teuluoedd.

"Mae hyn yn help mawr, ond wrth gwrs dim dyddiad eto, dim manylion am bryd fydd pobl yn dod."

Roedd pob sefydliad yn cydnabod ei fod wedi bod yn gyfnod anodd i'r gymuned.

Dywedodd yr Uwch-arolygydd Ross Evans o Heddlu Dyfed-Powys fod yr wythnosau diwethaf wedi bod yn "hynod o heriol".

Cadarnhaodd hefyd fod 18 o arestiadau wedi bod ar y safle, y rhan fwyaf yn digwydd dros yr wythnos ddiwethaf.

Ychwanegodd hefyd fod mwy o arestiadau yn debygol o ddilyn.

Apeliodd Heddlu Dyfed-Powys a Clearsprings Ready ³ÉÈË¿ìÊÖs am dawelwch ar safle'r gwesty.

Yn ôl Cyngor Sir Caerfyrddin dyma yw'r "achos tristaf a mwyaf rhwygol ac anodd yr ydym wedi gorfod delio ag ef".

Dywedodd Jake Morgan, Dirprwy Brif Weithredwr Cyngor Sir Caerfyrddin fod y cyngor yn dal i gredu mai Gwesty Parc y Strade yw'r "safle anghywir a'r model gofal anghywir" i gartrefu'r ceiswyr lloches.

"Nid ydym yn credu bod model Clearsprings yn gweithio," meddai.

Ychwanegodd Mr Morgan: "Rydym yn gresynu at golli gwesty eiconig yn y sir a'r 100 o swyddi a gefnogwyd ganddo mewn cymuned na allai, a dweud y gwir, fforddio ysgwyddo'r fath golled."

Roedd yr holl gwestiynau i aelodau'r panel wedi cael eu cyflwyno ymlaen llaw, heb unrhyw gyfle am unrhyw sylwadau neu gwestiynau ychwanegol yn ystod y sesiwn.

Yn dilyn y sesiwn dywedodd Rob Lloyd, llefarydd ar ran Grŵp Gweithredu Ffwrnais nad oedd yn teimlo bod unrhyw un o'i bryderon wedi'u lleddfu.

Nid yw'n teimlo ychwaith bod gan y gymuned unrhyw ymddiriedaeth yn y Swyddfa Gartref na Clear Springs.

"Doedd fy nisgwyliadau i ddim yn uchel cynt, ac roeddwn i'n amau mai darllediad o wybodaeth gyhoeddus unochrog fydden ni'n ei gael," meddai.

"Dyna gawson ni, a dwi ddim yn meddwl ei fod wedi gwneud unrhyw beth i leddfu teimladau pobl Llanelli.

"Mae hon yn gymuned sy'n teimlo fel eu bod nhw'n cael eu sathru dan droed gan y Swyddfa Gartref a Clearsprings Ready ³ÉÈË¿ìÊÖs.

"Mae'r cynllun yma wedi cael ei drafod ers dechrau Ebrill, fel 'dyn ni wedi clywed heno, a 'dyn ni nawr yn niwedd Awst ac o'r diwedd yn cael y darn cyntaf o ymgynghori cyhoeddus ar y peth."

Wrth siarad ar Dros Frecwast, dywedodd y Canon Aled Edwards oedd yn cadeirio'r sesiwn: "Ma' gynnon ni brofiadau da yng Nghymru o wneud y math yma o beth.

"Ond ma' 'na lwybr gwbl unigryw i'r trefniadau yma," ychwanegodd.

"Mi oedd yr heddlu neithiwr [yn y cyfarfod nos Fawrth] yn mynegi pryder, mi oedd hefyd y cyngor sir yn mynegi pryder.

"Dw i'n credu ei bod hi'n llesol bod y lleisiau hynny wedi cael eu clywed a wedi eu mynegi yn eglur iawn.

"Mwya'n byd ma' pobl yn siarad ac yn rhoi gwybodaeth sicr i bobl gorau'n byd, yn benodol pan fo gan bobl, fel yn yr achos yma, bryderon dilys."