³ÉÈË¿ìÊÖ

Mae cwest wedi ei agor i farwolaeth babi wyth mis oed a fu farw ar ôl cael ei tharo gan gar tu allan i ysbyty.

Roedd Mabli Cariad Hall yn ei choets pan gafodd ei tharo y tu allan i Ysbyty Llwynhelyg, Hwlffordd ar 21 Mehefin.

Clywodd y cwest fod yr heddlu wedi derbyn galwad brys am wrthdrawiad rhwng car a cherddwyr am 11:50.

Cafodd Mabli ei chludo mewn hofrennydd i Gaerdydd, cyn cael ei throsglwyddo'n ddiweddarach i Ysbyty Plant Bryste.

Clywodd Llys Crwner Sir Benfro a Sir Gaerfyrddin bod Mabli wedi marw o anaf difrifol i'w hymennydd yn yr ysbyty plant am 01:25 ar 25 Mehefin, bedwar diwrnod ar ôl y digwyddiad.

Dioddefodd gyrrwr BMW gwyn a'i tarodd anafiadau nad oedd yn peryglu bywyd, ac fe gafodd ei gludo i'r ysbyty yn ogystal â theithiwr arall yn y car, a cherddwr arall a gafodd eu taro hefyd.

Dywedodd Swyddog y Crwner, Carrie Sheridan, fod Mabli wedi bod yn ei choets ar adeg y gwrthdrawiad, a ddigwyddodd o flaen prif fynedfa'r ysbyty.

Mynegodd yr Uwch Grwner Dros Dro, Paul Bennett, ei gydymdeimlad i deulu Mabli.

Mewn datganiad, dywedodd ei theulu: "Mae colli Mabli Cariad wedi newid ein bywydau am byth.

"Mae'r boen a'r galar rydyn ni'n teimlo yn amhosib disgrifio.

"Yn ystod y cyfnod ofnadwy o boenus yma, does dim ateb i'r cwestiwn canolog ynghylch colled ein babi prydferth.

"Pam bod hyn wedi digwydd?

"Rydym yn gobeithio y bydd agor y cwest ac ymdrechion Heddlu Dyfed-Powys yn rhoi'r wybodaeth sydd ei angen i ateb y cwestiwn.

"Fel teulu rydym yn gobeithio y bydd y broses yn helpu i leihau'r risg o'r fath drychineb yn digwydd i eraill yn y dyfodol."

Cafodd y cwest ei ohirio nes 25 Ionawr, 2024, tra bod ymchwiliad llawn yn parhau.

Mewn datganiad ddydd Mawrth, dywedodd Heddlu Dyfed-Powys bod yr ymchwiliad i'r digwyddiad yn parhau.

Dywedodd llefarydd bod "swyddogion arbenigol yn parhau i gefnogi'r teulu", ac nad oes unrhyw un wedi ei arestio mewn cysylltiad â'r ymchwiliad.