³ÉÈË¿ìÊÖ

Mae Cyngor Sir Caerfyrddin yn dweud eu bod wedi cael cadarnhad gan y Swyddfa Gartref eu bod yn bwriadu cartrefu ceiswyr lloches mewn gwesty yn Llanelli.

Mae'r Swyddfa Gartref wedi gwrthod cadarnhau hynny i'r ³ÉÈË¿ìÊÖ, gan ddweud na allan nhw wneud sylw ar "gytundebau masnachol".

Mae'r cyngor "yn gadarn yn erbyn newid defnydd Gwesty Parc y Strade ac yn parhau i ymchwilio i'r sefyllfa gyfreithiol o ran y bwriad hwn".

Yn ôl y cyngor, bwriad Llywodraeth y DU ydy defnyddio hyd at 77 o ystafelloedd er mwyn cynnig llety i 207 o bobl o 3 Gorffennaf ymlaen.

Ychwanegodd y cyngor y daeth cadarnhad ysgrifenedig gan y Swyddfa Gartref brynhawn Gwener "yn dilyn gofyn sawl gwaith am wybodaeth".

'Gwarthus'

Fe wnaeth Cyngor Sir Gaerfyrddin, Comisiynydd Heddlu a Throseddu Heddlu Dyfed-Powys a Bwrdd Iechyd Hywel Dda godi pryderon ar y cyd am y cynlluniau yr wythnos ddiwethaf.

Roedden nhw'n honni y byddai'r cynlluniau'n cael effaith negyddol ar y gymuned ac yn rhoi "straen sylweddol" ar addysg a gwasanaethau iechyd.

Dywedodd arweinydd Cyngor Sir Caerfyrddin, y Cynghorydd Darren Price: "Rwy'n credu ei fod yn warthus fod y bwriad hwn gan y Swyddfa Gartref i letya nifer fawr o geiswyr lloches yn mynd yn ei flaen.

"Hyd yn oed ar yr adeg hon, rwy'n galw ar berchnogion y gwesty, Sterling Woodrow, i ailfeddwl ac atal hyn rhag symud ymlaen."

'Hollol anaddas'

Ychwanegodd Aelod Seneddol Llafur Llanelli, Nia Griffith ar raglen Post Prynhawn: "Mae'n dangos pa mor ofnadwy yw'r sefyllfa yn y Swyddfa Gartref, achos dylen nhw ffeindo ffordd arall yn lle cael mwy a mwy o westai.

"Dylen nhw daclo'r holl broblem ffoaduriaid, a chael uned heddlu arbennig i wneud hyn, ac wrth gwrs cael gwared ar y backlog o 160,000 o geisiadau lloches.

"Petae nhw'n gwneud hyn bydde nhw'n gallu anfon yn ôl y rhai sydd wedi dod o lefydd diogel, a wedyn y rhai sydd wir yn ffoaduriaid bydden nhw'n gallu setlo mewn grwpiau bach mewn cymunedau addas.

"Ond beth ry'n ni nawr yn gweld yw bod nhw'n cael - unwaith eto - gwesty lle mae busnes, a phriodasau ac yn y blaen a phobl wedi bwcio, a'r bobl sy'n gweithio yno.

"Mae cymaint o bobl yn cael eu heffeithio, ac wrth gwrs mae'r gymuned yn dweud ei fod yn hollol anaddas mewn pentref bach fel Ffwrnes.

"Does dim gwybodaeth gan y perchnogion, sy'n allweddol yn yr holl beth, a dyw'r Swyddfa Gartref ei hunan ddim yn cymryd unrhyw sylw o'r gwrthwynebiad."

Mae'r Swyddfa Gartref wedi gwrthod cadarnhau'r cynllun i'r ³ÉÈË¿ìÊÖ, gan ddweud na allan nhw wneud sylw ar "gytundebau masnachol".

Yn gynharach yr wythnos hon dywedodd llefarydd: "Mae nifer y bobl sy'n cyrraedd y DU sydd angen llety wedi cyrraedd y lefelau uchaf erioed ac mae straen aruthrol ar ein system lloches.

"Mae'r Swyddfa Gartref wedi ymrwymo i leihau'r defnydd o westai a chyfyngu ar y baich ar drethdalwyr."

Mae perchnogion y gwesty, Sterling Woodrow, wedi cael cais am sylw.