³ÉÈË¿ìÊÖ

Mae cyfres o fideos Saesneg newydd wedi cael eu creu gan y Mudiad Meithrin er mwyn ceisio annog mwy o rieni di-Gymraeg i ddewis addysg Gymraeg i'w plant.

Y bwriad yw ceisio annog mwy ohonyn nhw i anfon eu plant i Gylchoedd Ti a Fi a Chylchoedd Meithrin, gyda'r gobaith y bydd hynny'n arwain at eu hanfon i ysgolion Cymraeg maes o law.

Daw hynny wrth i ffigyrau'r Cyfrifiad diweddar ddangos cwymp sylweddol yn nifer y plant yng Nghymru sy'n medru siarad yr iaith, er gwaethaf targed Llywodraeth Cymru o filiwn o siaradwyr erbyn 2050.

Dywedodd un o swyddogion y Mudiad Meithrin fod yr ymgyrch newydd yn pwysleisio'r neges "fod Cymraeg ar gael i bawb, a bod e'n bwysig bod y rhieni yn deall hwn".

Taclo'r ansicrwydd

Mae'r cyfres o fideos, sydd wedi'u cynhyrchu gan dîm Talaith y De-ddwyrain Mudiad Meithrin a'u , yn cynnwys rhieni di-Gymraeg yn esbonio pam eu bod nhw wedi anfon eu plant i gylchoedd meithrin Cymraeg.

Yn ogystal â hynny, mae 'na oedolion sydd bellach yn gweithio drwy'r Gymraeg yn esbonio pam fod addysg meithrin, cynradd ac uwchradd Cymraeg wedi eu helpu nhw i gyrraedd ble maen nhw heddiw.

Dywedodd Rhian Thomas, Swyddog Cefnogi gyda'r Mudiad Ysgolion Meithrin, fod yr "ymateb ar-lein wedi bod yn ffantastig".

"Mae'n bwysig rhoi'r neges bod Cymraeg ar gael i bawb, a bod e'n bwysig bod y rhieni yn deall hwn," meddai wrth siarad ar raglen Dros Frecwast ³ÉÈË¿ìÊÖ Radio Cymru.

"Mae lot o ansicrwydd yn dod o rieni, ond fi'n credu mai'r neges bwysig yw bod e ddim yn rhwystredig, a bod y daith wedyn drwy ofal plant ac addysg Gymraeg yn anelu at fod yn ddwyieithog."

Cafodd Rhian ei hun ei magu mewn cartref di-Gymraeg, ac mae'n dweud bod ei thad wedi gwneud penderfyniad tebyg i'r hyn maen nhw nawr yn annog rhieni eraill i'w wneud.

"Roedd e hefyd yn dod o gartref di-Gymraeg, ond oedd lot o'i deulu fe yn siarad Cymraeg, felly penderfynodd Dad yn ifanc iawn i anfon ei blant i addysg Gymraeg, i ni fel teulu," meddai.

Dywedodd Rhian Thomas bod mwy o rieni'n dangos diddordeb mewn anfon eu plant i ysgolion meithrin Cymraeg, gyda'r mwyafrif ddim yn siarad yr iaith eu hunain.

Ar draws y wlad roedd 77% o'r rhieni sy'n anfon eu plant i addysg meithrin Cymraeg ddim yn siarad yr iaith eu hunain, meddai, "ac yn nhalaith y de-ddwyrain mae'n cynyddu wedyn i 97%".

'Teimlo'n rhan o'r gymuned'

Mae un o'r fideos yn cynnwys dwy ddynes sy'n gyn-ddisgyblion gyda'r Mudiad Meithrin, a bellach wedi llwyddo i gael swyddi yn y Gymraeg.

"Roedd fy rheini eisiau i fi gael y cyfleoedd wnaetho nhw ddim cael wrth dyfu lan," meddai Morgan Hart, 21, sy'n gweithio yng Nghylch Meithrin Canol Dref, Pen-y-bont ar Ogwr.

"Roedden nhw eisiau i bob drws fod ar agor i fi, a dyna wnaethon nhw. Nes i ddechrau mewn Cylch Meithrin yn ddwy oed, ac os chi'n dechrau mewn Cylch Meithrin mae'n gychwyn cadarn i bopeth arall."

Ychwanegodd Evie Wilkins, 20, sydd bellach yn gweithio fel cynorthwyydd yn Ysgol Gyfyn Gwynllyw, fod "neb yn fy nheulu wedi bod i ysgol Gymraeg".

"Felly penderfynon nhw anfon i Gylch Meithrin oedd yn agos i ni," meddai.

"Wnaethon ni fwynhau'n fawr - mae plant yn pigo lan ieithoedd mor hawdd, mae'n hollol ddiymdrech."

Mae Alys a Tim Carter yn rhieni sydd nawr yn anfon eu plant i Gylch Meithrin, ac yn dweud eu bod nhw'n teimlo'n "rhan o'r gymuned yn syth" er nad ydyn nhw'n siarad Cymraeg.

"Maen nhw'n cael gymaint o hwyl… pethau bach fel yr wythnos hon roedd hi'n eistedd wrth fwrdd y gegin yn cyfri' i 10 yn Gymraeg a doedd gennym ni ddim syniad ei bod hi'n medru gwneud hynny!" meddai Alys.

Ychwanegodd Tim: "Dwi'n meddwl ei bod hi'n bwysig iawn magu ein plant yn ddwyieithog i fynegi eu hunain yn Gymraeg ac yn Saesneg.

"Dydyn ni ddim teimlo ein bod yn cael ein gadael allan gan nad ydyn ni'n siarad Cymraeg."