³ÉÈË¿ìÊÖ

Bydd ymgynghoriad cyhoeddus yn allweddol o ran penderfynu ar ddyfodol dau o safleoedd gwasanaeth Ambiwlans Awyr Cymru yn y gogledd, mae arweinwyr iechyd wedi clywed.

Mae cynlluniau wedi cael eu llunio i ail-leoli safleoedd y gwasanaeth yng Nghaernarfon a'r Trallwng a chreu un canolfan yng nghanol y rhanbarth.

Mae'r awgrym wedi ennyn cryn wrthwynebiad mewn sawl ardal wledig.

Mewn cyfarfod ddydd Mawrth, clywodd prif weithredwyr holl fyrddau iechyd Cymru ac arweinwyr Ymddiriedolaeth Ambiwlans Cymru y byddai'r cynlluniau'n gwella'r ymateb brys ar draws Cymru ac amseroedd aros i gleifion.

Mae adroddiad gan bwyllgor Gwasanaeth Iechyd Gwladol Cymru yn cynnwys sawl opsiwn ond mae'n ffafrio creu un safle newydd yng nghanol y gogledd ger yr A55 - o bosib yn Sir Conwy neu Sir Ddinbych.

Mae ³ÉÈË¿ìÊÖ Cymru ar ddeall mai un o'r safleoedd sydd dan ystyriaeth ydy hen safle hofrennydd Heddlu Gogledd Cymru yn Rhuddlan, Sir Ddinbych.

Yn ôl ymchwil a gafodd ei rannu yn y cyfarfod, byddai cartrefu hofrenyddion a cherbydau eraill mewn un safle canolog yn caniatáu shifftiau gwahanol gan sicrhau bod meddygon ar gael am chwe awr yn rhagor bob dydd.

Y gred yw y byddai'r model newydd â'r potensial i alluogi meddygon "i fynychu 583 o alwadau yn rhagor er mwyn achub bywydau" a gwella amser ymateb y criw o 11 munud.

O ganlyniad fe fyddai'r gwasanaeth yn gwella'r ddarpariaeth mewn ymateb i'r galw o 72% i 88% gyda'r un nifer o hofrenyddion a staff meddygol.

Dywedodd y Dirprwy Brif Gomisiynydd Gwasanaethau Ambiwlans, Ross Whitehead wrth y pwyllgor y byddai'r newidiadau'n lleihau'r "adnoddau sy'n cael eu tan-ddefnyddio ac anghenion nad sy'n cael eu diwallu".

Fe nododd y Prif Gomisiynydd Gwasanaethau Ambiwlans, Stephen Harrhy y byddai "ymgynghoriad yn bwysig" gan wahodd aelodau'r cyhoedd i leisio'u barn pan ddaw'r amser i wneud hynny.

Bydd y cynlluniau nawr yn cael eu cwblhau cyn i'r pwyllgor benderfynu pa bryd fydd ymgynghoriad cyhoeddus yn cael ei gynnal - yr wythnosau wedi'r Nadolig sy'n debygol.

Serch yr awgrym y byddai'r newidiadau'n cynyddu'r ddarpariaeth, mae ymgyrchwyr yn poeni am allu meddygon i gyrraedd safleoedd gwledig ar frys mewn ardaloedd fel Pen LlÅ·n, Powys a de Gwynedd.

Mae miloedd o lofnodion eisoes wedi eu derbyn gan ddeisebau ar-lein yn galw ar y gwasanaeth i beidio â chau na uno'r safleoedd.

Ond mae'r adroddiad yn nodi fod unrhyw awgrymiadau wedi eu gwneud ar sail "dadansoddiad trylwyr" o dystiolaeth er mwyn gwella'r ddarpariaeth mewn modd effeithiol ac effeithlon.

Mae'n dweud y byddai "pob sir yn elwa o gynnydd yn nifer yr achosion" y mae criwiau'n ymateb iddynt.

Bydd dyddiad ymgynghoriad cyhoeddus yn cael ei gyhoeddi maes o law.