³ÉÈË¿ìÊÖ

Mae Llywodraeth Cymru'n rhoi £1.3m ychwanegol i'r Urdd i helpu'r mudiad ieuenctid "ailadeiladu" wedi'r pandemig.

Bydd yr arian yn helpu'r mudiad "unigryw" i ddiogelu swyddi a dechrau creu rhai newydd, medd y Gweinidog Iechyd Meddwl, Llesiant a'r Gymraeg, Eluned Morgan.

Ychwanegodd: "Bydd dros 60 o staff ychwanegol yn cael eu cyflogi, ac mae gan yr Urdd gynlluniau i greu hyd at 300 o brentisiaethau cyfrwng Cymraeg newydd dros y tair blynedd nesaf."

Wrth lansio ymgyrch casglu arian newydd fis Tachwedd y llynedd, dywedodd yr Urdd eu bod wedi colli 49% o'i weithlu oherwydd y pandemig.

Mae Eisteddfod yr Urdd, oedd i fod i ddigwydd yn Sir Ddinbych yn 2020 yn wreiddiol, hefyd wedi cael ei gohirio tan 2022.

Dywedodd Eluned Morgan yng nghynhadledd Llywodraeth Cymru fod yr Urdd "yn un o brif gyflogwyr trydydd sector Cymru sy'n cynnig ystod eang o brofiadau trwy gyfrwng y Gymraeg i bobl ifanc".

Mae hynny yn ei dro, meddai, yn helpu Llywodraeth Cymru gyrraedd ei nod o sicrhau miliwn o siaradwyr Cymraeg erbyn Cymraeg 2050 a "helpu cynnig prentisiaethau cymunedol i bobl ifanc".

Cyfeiriodd at bwysigrwydd cefnogi plant a'r sector greadigol drwy'r pandemig, gan eu disgrifio fel dau grŵp sydd "wedi dioddef mewn ffordd hynod" yn y flwyddyn ddiwethaf.

Ymhlith y mudiadau sydd wedi elwa o'r Gronfa Adfer Diwylliannol yw Ymddiriedolaeth Nant Gwrtheyrn.

Yn ôl Ms Morgan, mae'r ymddiriedolaeth yn dweud y bydd y cyllid "yn helpu cynnal ei gweithlu a gwella'r hyn y gall ei gynnig" pan fydd y Ganolfan Iaith Genedlaethol yn gallu ailagor i'r cyhoedd.

Pwysleisiodd Ms Morgan bod cael plant a phobl ifanc yn ôl yn yr ysgolion yn flaenoriaeth wrth i weinidogion adolygu'r cyfnod clo presennol cyn cyhoeddiad y Prif Weinidog, Mark Drakeford ddydd Gwener.

Gyda'r plant ieuengaf yn dechrau dychwelyd i'r ysgol o 22 Chwefror ymlaen, dywedodd y bydd mwy yn gallu gwneud hynny hefyd dros yr wythnosau nesaf "wrth i'r sefyllfa iechyd cyhoeddus barhau i wella".

Ond mae'n cydnabod fod dysgu o adref wedi bod yn her i lawer, gan gynnwys i rieni.

Oherwydd hynny, meddai, bydd Llywodraeth Cymru'n buddsoddi £15m yn rhagor mewn technoleg addysg dros y flwyddyn ariannol nesaf i wella cysylltedd ysgolion a'u disgyblion.