³ÉÈË¿ìÊÖ

Mae ffoaduriaid o Syria, sydd bellach wedi ymsefydlu yng nghanolbarth Cymru, wedi mynd ati i ddechrau busnes drwy sefydlu bwyty pop-yp.

Mewn digwyddiad ym mwyty Medina yn Aberystwyth, daeth 120 o bobl at ei gilydd i flasu bwydydd oedd wedi ei paratoi gan griw o fenywod.

Daeth y teuluoedd cyntaf o Syria i Aberystwyth yn 2015, ac ers hynny, mae ymdrechion wedi bod i helpu'r teuluoedd i deimlo'n gartrefol yn y dref.

Roedd y digwyddiad yn rhan o brosiect integreiddio, sy'n cael ei redeg drwy'r Groes Goch.

Yn dilyn gwaith y prosiect, mae busnes newydd bellach wedi ei sefydlu, a gobaith y teuluoedd yw mynd â'u bwyty newydd i ddinasoedd ar draws Cymru a gweddill Prydain.

Ar y cyd â'i hastudiaethau, mae Ghofran Hamza, sy'n 20 oed, yn gobeithio y bydd y busnes yn tyfu mewn poblogrwydd.

"Mae'r bwyd a'r digwyddiadau yma'n anhygoel, i ni gael gweld pobl yn mwynhau," meddai.

"Rydym ni'n rhoi llawer o gariad a theimlad wrth greu'r bwyd yma, a dwi wrth fy modd yn gweld pobl yn derbyn y cariad yna.

"Dydyn ni ddim yn elusen, ac roeddem ni eisiau sefydlu'r busnes yma ar gyfer ein dyfodol, a dyfodol ein plant.

"Mae cynlluniau mawr gyda ni, a'r gobaith yw y bydd y peth yn tyfu ac yn mynd yn fwy poblogaidd.

"Y prif nod yw i fynd â'r bwyty ar daith o amgylch gwahanol ddinasoedd - nid yn unig yng Nghymru, ond yn Lloegr, Yr Alban ac Iwerddon hefyd."

Dyma'r pedwerydd tro i'r bwyty pop-yp cael ei gynnal, a dyma'r un mwyaf uchelgeisiol eto.

Yn ôl Rose Bewick, sy'n gweithio i'r gwasanaeth ffoaduriaid yn y Groes Goch yn Aberystwyth, mae'r digwyddiadau'n rhan bwysig o integreiddio.

"Mae'r menywod yma wedi cyrraedd fel ffoaduriaid, ond maen nhw'n fwy na'r label yna," meddai Ms Bewick.

"Mae'r digwyddiadau hyn yn herio'r syniad bod y menywod yn ddioddefwyr.

"Mae ganddyn nhw rywbeth pwysig iawn i gyfrannu, rhywbeth sydd angen ei ddathlu a rhywbeth y mae gwerth talu amdano."