³ÉÈË¿ìÊÖ

Mae pwyllgor cynllunio Cyngor Caerffili wedi gwrthod cais cynllunio gan gwmni Miller Argent ar gyfer gwaith glo brig dadleuol Nant Llesg yng Nghwm Rhymni.

Pleidleisiodd 12 aelod yn erbyn y datblygiad ar sail effaith weledol y datblygiad gyda dau yn ymatal eu pleidlais.

Ni wnaeth unrhyw un bleidleisio o blaid.

Roedd y cwmni wedi dweud y byddai'r datblygiad yn creu hyd at 239 o swyddi llawn amser ac yn arwain at fuddsoddiad blynyddol o £13 miliwn.

Bu aelodau o fudiad Cyfeillion y Ddaear yn protestio y tu allan i'r cyfarfod.

Ym mis Mehefin fe wnaeth y pwyllgor ohirio penderfyniad ar y cais er mwyn rhoi amser i swyddogion y cyngor ganfod achosion priodol i'w wrthod.

Eisoes mae Miller Argent wedi awgrymu y gallai'r awdurdod wynebu bil cyfreithiol sylweddol os fydd y cwmni'n llwyddo gydag apêl yn erbyn y penderfyniad terfynol.

Gan fod swyddogion Cyngor Caerffili wedi argymell caniatáu'r datblygiad yn flaenorol, roedd y cwmni'n awgrymu y byddai ganddyn nhw le i apelio.