³ÉÈË¿ìÊÖ

Bydd ymgyrchwyr lleol yn picedu'r tu allan i swyddfeydd Cyngor Caerdydd yn ddiweddarach, gan ddadlau bod y cyngor wedi torri addewid i adeiladu ysgol gynradd Gymraeg newydd yn Grangetown.

Mae'r ymgyrchwyr yn dweud bod yr addewid wedi ei wneud yn dilyn ymgynghoriad ar ddechrau'r flwyddyn.

Bwriad y cyngor yw sefydlu trydedd ffrwd barhaol yn ysgol Gymraeg Pwll Coch.

Ond dywed rhai mae trefniant dros dro oedd hwn i fod.

Yn ôl y mudiad Rheini dros Addysg Gymraeg, roedd yna safle wedi ei glustnodi ar gyfer ysgol Gymraeg newydd ond mae'r lleoliad hwnnw yn cael ei ystyried nawr ar gyfer ysgol Saesneg.

Bydd y cabinet yn cwrdd i drafod ysgolion y sir ddydd Llun.

Mae RhAG wedi anfon llythyr at gynghorwyr y brifddinas yn lleisio'u gwrthwynebiad i'r cynlluniau arfaethedig.

Mae'r mudiad yn ofni bod y cyngor yn bwriadu cynnig gwneud y drydedd ffrwd yn Ysgol Pwll Coch yn un barhaol.

Meddai'r llythyr: "Rydym o'r farn nad yw'r cynnig i helaethu Ysgol Pwll Coch a sefydlu trydedd ffrwd barhaol yno yn ddatrysiad derbyniol i'r galw cynyddol am leoedd cynradd cyfrwng Cymraeg yn yr ardal. Mae gwrthwynebiad y rhieni i'r cynnig hwnnw'n glir.

"Amlygwyd hyn yn ystod ymgynghoriad mis Ebrill, lle bu'r ymateb yn ffyrnig ar lafar ac mewn 179 o lythyron gwrthwynebus gyda 17 yn unig o blaid y cynllun.

"Byddai gwasgu mwy o blant ar safle Ysgol Pwll Coch yn gwbl annheg ar y disgyblion ac yn gam gwag o safbwynt cynllunio Addysg Gymraeg yn yr ardal.

Yn ôl Euros ap Hywel, Swyddog Maes y De gyda Chymdeithas yr Iaith, mae Cyngor Caerdydd wedi "esgeuluso" addysg Gymraeg:

"Mae'r Gymraeg yn rhywbeth a ddylai berthyn i bawb a byddai'r Cyngor, drwy dorri ei addewid, yn rhwystro cenedlaethau o blant rhag cael y gallu i fyw yn Gymraeg. "

Wythnos diwethaf cynhaliwyd cyfarfod gan rai sydd yn byw yn Grangetown i drafod y mater.

Ychwanegodd Euros ap Hywel: "Pryder mawr ymysg rhieni a gofalwyr yr ardal yw bod Ysgol Gynradd Pwll Coch wedi bod yn llawn ers blynyddoedd a'r Cyngor yn gwneud dim - mae'n ymddangos fod y sefyllfa'n mynd o ddrwg i waeth wrth i'r Cyngor fygwth torri ar yr addewid yma.

"Dylai fod ysgol Gymraeg leol i bob cymuned yn y ddinas."

Ond mae Cyngor Caerdydd yn dweud eu bod yn ymateb i'r galw am addysg Gymraeg a bod ymgynghoriad ar ymestyn Ysgol Pwll Coch yn dangos hynny:

"Mae angen i ni ymateb i'r galw cynyddol am leoedd ysgol gynradd cyfrwng Cymraeg yn ardaloedd Treganna, Grangetown a Glan-yr-afon."

"Nid yw trefn dros dro yn briodol erbyn hyn, ac mae angen i ni ddechrau ymgynghoriad ym mis Medi ar gynnig i ymestyn Ysgol Gymraeg Pwll Coch yn barhaol gyda rhaglen fuddsoddi lawn, i'w chwblhau erbyn Medi 2015," meddai'r Cynghorydd Julia Magill sydd yn gyfrifol am addysg yn y sir.