In order to see this content you need to have both enabled and installed. Visit for full instructions
22 Ebrill 2010
Cadw at y ffydd y cafodd ei geni iddi
Cafodd Omid Behi ei eni i deulu a ddilynai ffydd y Baha'i.
"Ond yn y ffydd rhywbeth pwysig yw gwneud penderfyniad ein hunain pan rydym yn troi'n bymtheg oed," meddai ac fe wnaeth ef y penderfyniad hwnnw i gadw at y ffydd.
"Mae yna bwyslais mawr ar ymchwilio i'r gwirionedd ein hunain yn annibynnol," ychwanegodd Omid sy'n gweithio'n rhan amser mewn bwyty ym Mangor.
"Am flwyddyn mi wnes i roi amser i'r gymuned Baha'i," meddai.
"A dim jest efo dilynwyr y grefydd da ni yn gweithio ond efo pawb i weld sut da ni yn gallu gwneud ein cymunedau'n well," meddai.
"Mae 'na gymuned fach Baha'i yng ngogledd Cymru ac mae yna ryw wyth neu naw Baha'i ym Mangor ei hun . . . a phan oeddwn i yn y brifysgol yng Nghaerdydd roeddwn i'n rhan o gymuded ychydig bach mwy. Roedd yna lot o Baha'is yn y brifysgol. Lot fwy yn ne Cymru," meddai.
Ond ychwanegodd nad oes llawer sy'n siarad Cymraeg.
"Fi a fy chwiorydd a 'chydig bach," meddai.
"Mae yna bwyslais i ddysgu'r grefydd i bawb os ydyn nhw eisiau gwybod ond does yna ddim fforsio pobl.
"Achos ei fod yn rhywbeth pwysig i mi a dwi'n meddwl ei fod yn rhywbeth sbesial mae'n rhywbeth faswn i yn licio'i rannu efo pobl eraill os ydynt eisiau gwybod," meddai.
