 |
|
Helynt praidd mewn eglwys
Nofel gyffrous i rai rhwng saith a deg oed
Dydd Iau, Mehefin 21, 2001
|
GO
DDA GARETH! gan Lonna Bradley. Gwasg Carreg Gwalch. £3.95
ADOLYGIAD gan Meirion Puw Rees (12 oed)
Cyfres o straeon ydi Go Dda Gareth! am helyntion Gareth Elis
a bwlis y dref.
Mae’r rheini, Dici Doran, Bili Brown a’r gwaethaf un, Huw Befis yn
pigo arno yn ddyddiol. Ond cerddwch yn ofalus bois, mae Gareth yn
gallu brathu’n ôl!
Bywiog ac ysgafn
Straeon digon bywiog ac ysgafn sydd yma sy’n medru bod yn ddoniol
iawn ar adegau.
Mi nes i hoffi yr olygfa o Gareth yn chwalu un o gynlluniau y bwlis
wrth daflu fferins atynt o’i guddfan yn y goeden.
"Plethodd y band rwber am ei fysedd yn ofalus, gan osod un o’r fferins
ar y band, anelu, a thynnu’r rwber yn dyn cyn ei ollwng. Twang! Saethodd
y fferins drwy’r awyr nes taro Huw Befis ar ei war."
Mae hyn yn mynd ymlaen am sbel ac yn cythruddo Huw Befis gan nad ydi
o’n deall o le mae’r ergydion yn dod.
Mae yna olygfa arall pan yw Gareth yn y bath yn nhy ei nain ac mae’r
gath yn syrthio i mewn i’r dwr ato wrth chwarae hefo’r swigod.
"Cafodd y ddau (Gareth a’r gath) andros o hwyl gyda’r swigod
nes i’r gath neidio i fyny’n uchel ar ôl un swigen fawr a glanio ar
ei phen yn y dwr gyda sblash fawr."
Cyffrous yma ac acw
Mae’n gyffrous yma ac acw hefyd ac mae yna un neu ddwy o olygfeydd
felly.
Mae’r bwlis yn cornelu Gareth wrth ddrws ty ffrind i’w nain ac yn
taflu cerrrig ato ac mae Gareth mewn peryg o gael ei frifo ac mae
ffenestri Neli Roberts mewn peryg o gael eu torri.
Hefyd mae’n gweld dau frawd mawr y bwlis yn ceisio torri i mewn i
gar ei fodryb yn y nos ac mae Gareth yn gorfod meddwl am ffordd o’u
stopio.
Mae Gareth yn fachgen distaw a chlên iawn ond mae o yn cael ei hun
i rhyw drafferth o hyd ac mae troeon trwstan yn ei ddilyn i bob man,
wrth y llyn, yn y dref a hyd yn oed yng nghanol y nos!
Gareth sy’n cael bai ar gam am ambell i beth fel yr adeg mae’n cymryd
y bai am lenwi yr Eglwys hefo defaid!
Disgrifiadau da
Yn y straeon mae yna ddisgrifiadau da, hyd yn oed ardderchog ar adegau.
Mae’r olygfa o’r defaid yn yr Eglwys yn ddoniol iawn. Mae’r defaid
wedi eu dychryn ac wedi rhedeg i mewn i’r Eglwys rhwng coesau y Ficer,
mae Bet Dafis ar ben y meinciau yn sgrechian a tydi Mot y ci yn dda
i ddim.
"..Roedd y tair dafad wedi cyrraedd yr allor erbyn hyn, ac yn rhedeg
yn wyllt o un lle i’r llall. Rhuthrodd un i fyny grisiau’r pulpud,
cuddiodd un arall o dan fwrdd yr allor, ac aeth y drydedd at yr organ
gan sathru ar y pedalau nes bod y swn aflafar yn llenwi’r lle."
Mae meddwl am hyn yn digwydd yn go iawn yn g’neud i rywun chwerthin.
Hawdd i'w deall
Mi nes i fwynhau y llyfr, roedd yn ysgafn a doniol hefo straeon hawdd
i’w deall.
Weithiau roeddwn yn teimlo fod y ‘sgwennu yn blentynnaidd fel pan
fo’r awdur yn digrifio y bwlis fel "..hogia drwg iawn."
Mae hynny yn amlwg braidd. Mae Gareth yn cael y gorau o’r bwlis rhywsut
neu’i gilydd bob tro ond dim ond reit ar ddiwedd y llyfr mae o’n g’neud
rhywbeth sy’n rhoi stop ar y bwlio am byth, ond fedra i ddim dweud
dim mwy neu mi fydd yn difetha’r llyfr i chi….
Mi fyswn i yn dweud fod y llyfr yn addas i blant rhwng saith a deg
oed.
|
|
|
Gair
am air
Siart
Cymru
Llyfrau
ar y We
Nôl
i'r archif
