’مزارِ قائد پر نوبیاہتا عورت کے ساتھ زیادتی‘۔ جتنی مرتبہ بھی یہ خبر پڑھوں اتنا ہی زمین میں گڑتا چلا جاتا ہوں۔ لگتا ہے کہ قائد کے مزار کے پاس ہی کہیں زمین پھٹ رہی ہے اور میں اور میرے جیسے اس میں دھنستے جا رہے ہیں۔

کیا یہ کم تھا کہ انجانے خود کش بمبار سکولوں کے بچوں کو مار رہے تھے اور فوجی اپنے ہی ملک کے معصوموں اور شدت پسندوں کو بلا کسی تفریق کے ختم کر رہے تھے کہ اب مزارِ قائد پر ایک معصوم لڑکی کو دو دن تک زیادتی کا نشانہ بنایا جاتا رہا۔ قائد کے لیے اس سے زیادہ شرمندگی کی اور کیا بات ہو گی۔ قائد یا رہنما نے کبھی سوچا بھی نہیں ہو گا کہ جنہیں انہوں نے راستہ دکھایا وہ انہیں کے مزار پر یہ تک کر گزریں گے۔

ٹھیک ہے کہ مزارِ قائد بھی ایک مزار ہی ہے اور جس طرح قبرستانوں اور دیگر مزاروں پر جرائم پیشہ افراد اپنے گھناؤنے کاروبار کرتے رہتے ہیں اس طرح اِدھر بھی انسان بدل تو نہیں جاتے۔ مگر اس کے ساتھ ساتھ قائد کا مزار ایک عام مزار نہیں بھی ہے۔ یہ وہ جگہ ہے جہاں اس ملک کا بانی دفن ہے۔ اور ملک کے بانی سے ہی تو ملک کا کردار سامنے آتا ہے۔ مزارِ قائد درندگی کا مظاہرہ کرنے والوں نے قائد کے فرمان ’ فخر، اخلاقی بلندی، بے لوث خدمت، اور ذمہ داری کے احساس کے فروغ کے لیے آنے والی نسلوں کا اچھا کردار بنائیں‘ کا کیا مطلب نکالا ہے۔

دوسری اور اہم بات یہ ہے کہ یہ سب کچھ اس جگہ ہوتا رہا جہاں چوبیس گھنٹے مسلح گارڈ رہتی ہے۔ بھاری بوٹوں والے فوجی ہر وقت وہاں چوکس کھڑے رہتے ہیں۔ یہ کیسی چوکسی ہے کہ وہاں دو دن تک ایک معصوم لڑکی کے ساتھ زیادتی ہوتی رہی اور ملک کے محافظوں کو پتا بھی نہ چلا۔ نہ کسی کی جان محفوظ ہے اور نہ ہی کسی کی عزت۔